काठमाडौं । आईएमई लाइफ इन्स्योरेन्स कम्पनी लिमिटेडले गत आर्थिक वर्ष (आव) ०८०/८१ को मुनाफाबाट कुल २१ दशमलव शून्य ५३ प्रतिशत लाभांश प्रस्ताव गरेको छ ।

माघ २९ गते बसेको कम्पनीको सञ्चालक समितिको बैठकले गत वर्षको मुनाफाबाट हाल कायम चुक्तापूँजीको आधारमा करसमेत २१ दशमलव शून्य ५३ प्रतिशत नगद लाभांश वितरण गर्ने प्रस्ताव गरेको हो । हाल कम्पनीको चुक्तापूँजी ५ अर्ब रुपैयाँ रहेको छ ।

सोही पूँजीको आधारमा कम्पनीले १ अर्ब ५ करोड २६ लाख ३२ हजार रुपैयाँ बराबरको नगद लाभांश (करसमेत) वितरण गर्ने तयारी कम्पनीले गरेको हो । कम्पनीले बीमा प्राधिकरणको निर्देशनबमोजिम तोके बमोजिमको चुक्तापूँजी कायम गरिसकेको अवस्थामा यस वर्ष नगद लाभांशलाई जोड दिएको हो ।

गत वर्ष कम्पनीले २५ प्रतिशत बोनस शेयर र कर प्रयोजनका लागि १ दशमलव ३२ प्रतिशत नगद लाभांश वितरण गरेको थियो । प्रस्तावित लाभांश नेपाल बीमा प्राधिकरणले स्वीकृति प्रदान गरी कम्पनीको आगामी वार्षिक साधारण सभाबाट पारित भएपछि वितरण हुनेछ ।