काठमाडौं । चैतमा धितोपत्र दोस्रो बजारमा ५७ अर्ब २२ करोड ४१ लाख रुपैयाँभन्दा बढीको धितोपत्र खरीदविक्री भएको छ । उक्त रकम बराबरको १५ करोड ५९ लाख १२ हजार कित्ता धितोपत्र चैतमा कारोबार भएको नेपाल स्टक एक्सचेञ्ज (नेप्से)ले जानकारी दिएको हो । 

कुल कारोबारमा सर्वाधिक हिस्सा जलविद्युत कम्पनीका धितोपत्रले ओगटेका छन् । चैतमा जलविद्युत समूहको सर्वाधिक १५ अर्ब २ करोड ७६ लाख रुपैयाँभन्दा बढीको ५ करोड ६ लाख १७ हजारभन्दा बढी शेयर कारोबार भएको हो ।

पछिल्लो समय कारोबार रकममा जलविद्युत समूहले नै सर्वाधिक हिस्सा ओगट्दै आएको छ । फागुनमा पनि जलविद्युत समूहकै सर्वाधिक रकमको कारोबार भएको थियो । फागुनमा ६१ अर्ब ६८ करोड रुपैयाँभन्दा बढीको धितोपत्र कारोबार भएकोमा जलविद्युत समूहको सर्वाधिक २३ अर्ब ३९ करोड ४४ लाख रुपैयाँभन्दा बढीको शेयर कारोबार भएको थियो । चैतमा सर्वाधिक हिस्सा ओगटेको जलविद्युत समूहको शेयर कारोबार फागुनको तुलनामा भने चैतमा घटेको हो । कुल कारोबार रकम पनि फागुनको तुलनामा चैतमा घटेको हो ।

चैतको कारोबारमा सर्वाधिक हुने दोस्रो नम्बरमा उत्पादन तथा प्रशोधन समूह छ । उत्पादन तथा प्रशोधन समूहको ७ अर्ब ८७ करोड रूपैयाँभन्दा बढीको १ करोड २५ लाख ६६ हजारभन्दा बढी कित्ता शेयर कारोबार भएको नेप्सेको तथ्याङ्कले देखाउँछ ।

त्यस्तै लघुवित्त समूहको ७ अर्ब ४४ करोड रुपैयाँभन्दा बढी, वित्तको ६ अर्ब ७८ करोड रुपैयाँभन्दा बढी, जीवन बीमाको ३ अर्ब ६३ करोड रुपैयाँभन्दा बढी, बैंकिङको २ अर्ब ९९ करोड रुपैयाँभन्दा बढी, विकास बैंकको २ अर्ब ९३ करोड रुपैयाँभन्दा बढी, संस्थापक शेयर २ अर्ब ७० करोड रुपैयाँभन्दा बढी, अन्य समूहको २ अर्ब ५३ करोड रुपैयाँभन्दा बढी, निर्जीवन बीमाको १ अर्ब ८८ करोड रुपैयाँभन्दा बढी, लगानीको १ अर्ब ७२ करोड रुपैयाँभन्दा बढी, होटल्स तथा पर्यटनको १ अर्ब १ करोड रुपैयाँभन्दा बढी, ऋणपत्रको ३४ करोड ८६ लाख रुपैयाँभन्दा बढी, व्यापारिकको २० करोड ६६ लाख रुपैयाँभन्दा बढी र म्युचुअल फण्डको १० करोड ५९ लाख रुपैयाँभन्दा बढीको कारोबार भएको छ । 

म्युचुअल फण्डको कारोबार चैतमा सबैभन्दा कम भएको हो । फागुनमा ऋणपत्रको कारोबार हिस्सा सबैभन्दा कम थियो । ऋणपत्रको कारोबारमा भने चैतमा वृद्धि भएको छ । फागुनमा ५ करोड ७५ लाख रुपैयाँभन्दा बढीको ५९ हजारभन्दा बढी कित्ता ऋणपत्र कारोबार भएको थियो । 

कम्पनीको हिसाबमा भने चैतमा गोर्खाज फाइनान्सको सर्वाधिक रकमको शेयर खरीदविक्री भएको छ । नेप्सेका अनुसार गोर्खाज फाइनान्सको २ अर्ब ८० करोड रुपैयाँभन्दा बढीको शेयर चैतमा मात्र कारोबार भएको हो ।

समूह	कारोबार रकम रू दश लाखमा	कारोबार कित्ता हजारमा
जलविद्युत्	15027.6	50617.25
उत्पादन तथा प्रशोधन	7878.7	12566.88
लुघवित्त	7445.36	8437.52
वित्त	6782.14	13121.15
जीवन बीमा	3635.27	7105.62
बैंकिङ	2999.66	13455.21
विकास बैंक	2930.5	8187.39
संस्थापक शेयर	2701.33	17778
अन्य	2534.75	4097.51
निर्जीवन बीमा	1888.36	2867.87
लगानी	1724.93	3510.79
होटल्स् तथा पर्यटन	1014.24	1615.91
ऋणपत्र	348.68	342.72
व्यापारिक	206.65	43.3
म्युचुअल फण्ड	105.94	12165.31
कुल कारोबार	57224.11	155912.43

स्रोत : नेप्से ।