काठमाडौं । उद्योग वाणिज्य तथा आपूर्तिमन्त्री दामोदर भण्डारीले लगानी सम्मेलनको समय पारेर निजीक्षेत्र र दातृ निकायलाई सहज हुने गरी १० ओटा कानून संशोधन गर्न लागेको बताएका छन् । 

न्यू बिजनेश एज प्रालिले काठमाडौंमा आयोजना गरेको आठौं संस्करणको न्यूबिज बिजनेस् कन्क्लेभ एण्ड अवार्डस्लाई सम्बोधन गर्दै उनले निजी क्षेत्रसँग सहकार्य गर्दै कानून संशोधन गर्न लागेको बताएका हुन् । उनले अन्तरमन्त्रालयमा रहेका कानूनलाई समेत फास्ट ट्र्याकबाट समेटेर अगाडि बढ्ने बताए ।

उद्योगमन्त्री भण्डारीले नेपालको अर्थतन्त्र चुनौतीपूर्ण अवस्थामा रहेको र यसको समाधान पनि भएको बताए । ‘अर्थतन्त्र चुनौतीपूर्ण अवस्थामा छ । यसको समाधानका उपाय पनि होलान् । यस्ता छलफलबाट निष्कर्ष पनि आउने छन्,’ उनले भने । 

निराशालाई चिर्दै आशा जगाउने प्रतिवद्धतासहित सरकारले केही अवधारणा सार्वजनिक गरेको र त्यसकै जगमा अगाडि बढ्न खोजेको उनको भनाइ छ । ‘लगानी किन भित्रिएको छैन ? लगानीको वातावरण किन बनेन ? नेपालको ठूलो जनशक्ति विदेशिदै छ । नेपालका सम्भावनाप्रति निराशा छ, यसलाई चिर्नुपर्ने छ । यसका कारण धेरै होलान् । नीतिगत अस्पष्टका कारण पनि होला, यसमा सरकार संवेदनशील छ,’ उद्योगमन्त्री भण्डारीले भने । 

आर्थिक क्षेत्रमा भएका संकटको मोचनका लागि सरकारले लगानी सम्मेलन गर्न लागेको उनले बताए ।

उनले लगानी गर्न इच्छुक दातृ निकाय र निजीक्षेत्रलाई नीतिगत समस्या नरहेको भन्दै ढुक्कसँग लगानी गर्ने वातावरण बनाउने प्रतिबद्धता गरे । ‘यी समस्यासँग जुधेर आएका निजीक्षेत्रलाई समेटेर सम्भावनामा बदल्दै सरकारले अगाडि बढ्छ । सरकारले स्टार्टअपका नीतिलाई प्राथमिकतामा सारेको नेपाली उत्पादनलाई प्रोत्साहित गरेको छ,’ उनले भने ।