काठमाडौं । ब्रोकर नम्बर २० को सिप्ला सेक्युरिटिज र लगानीकर्ता दीपेन्द्र अग्रवालबीच हिसाब मिलानको विषयमा टकराव देखिएको छ । 

अग्रवालले आफ्नो स्वार्थ भएको कम्पनीको शेयर मूल्य बढाउन सर्वसाधारण लगानीकर्तालाई शेयर किन्न सुझाव दिने गरेको आरोप लागेका कारण उनलाई शेयरबजारका विवादास्पद लगानीकर्ता पनि मानिन्छ । पाँच वर्षदेखि उक्त ब्रोकर कम्पनीमार्फत कारोबार गर्दै आएका अग्रवालमाथि कम्पनीले १६ करोड रुपैयाँ बराबरको चेक हिसाब मिलानको क्रममा चोरेर भागेको आरोप लगाएको छ । कम्पनीले केही दिनअघि नेपाल प्रहरीको केन्द्रीय अनुसन्धान ब्युरोमा पनि अग्रवालविरुद्ध उजुरी दर्ता गरेको थियो ।

• दीपेन्द्र अग्रवालमाथि १६ करोडको चेक चोरेको सिप्ला सेक्युरिटिजको आरोप
•  प्रहरीको केन्द्रीय अनुसन्धान ब्युरोमा उजुरी
•  तीन वर्षदेखि पाउनुपर्ने भुक्तानी सिप्लाबाट नपाएको अग्रवालको दाबी
•  अग्रवाल भन्छन्– चेक बाउन्स हुने भएपछि चोरीको आरोप लगाए 

विज्ञप्तिमा कम्पनीले विगतमा पनि अग्रवालबाट धितोपत्र व्यवसायी पीडित भएको उल्लेख गर्दै यस्ता लगानीकर्ताबाट सचेत रहन र तत्काल कारोबार रोक्का गरी निजसँगको हिसाब चुक्ता गर्न सबै धितोपत्र दलाल व्यवसायीलाई अनुरोध गरेको छ । यसबीच, अग्रवालले सोमवार प्रेस विज्ञप्ति जारी गरी ब्रोकर कम्पनीको दाबी खण्डन गर्दै सिप्लामाथि नै आरोपको वर्षा गरेका छन् । 

सिप्ला सेक्युरिटिजले लगानीकर्ता अग्रवालसँग लामो समयदेखि चलिआएको हिसाब मिलानसम्बन्धी मतभेदबारे जानकारी दिँदै यस विषयमा नेपाल प्रहरीको केन्द्रीय अनुसन्धान ब्युरो (सीआईबी) को मध्यस्थतामा हिसाब मिलानको पहल भएको बताएको छ ।

हिसाब मिलानका लागि असोज ४ गते दिउँसो २ बजे टोखास्थित ग्लोबल आइएमई बैंकको शाखा कार्यालयमा जम्मा गर्न सिप्ला सेक्युरिटिजका प्रतिनिधिले १ करोड रुपैयाँ दरका १६ ओटा चेक लिएर गएको, सोही दिन लगानीकर्ता अग्रवाल आफूले सेक्युरिटिजलाई तिर्नुपर्ने हिसाब मिलानका लागि आएको र ती प्रतिनिधिलाई झुक्याएर आफै शाखा प्रबन्धकसमक्ष हिसाब मिलान गर्न लगाउँछु भन्दै चेक लिएर फरार भएको सिप्ला सेक्युरिटिजको आरोप छ । 

अग्रवालले पनि सोमवार विज्ञप्ति जारी गरेर ब्रोकर कम्पनीमाथि विभिन्न आरोप लगाएका छन् । शुरूका दिनमा समयमै रकम भुक्तानी गरे पनि विगत ३ वर्षदेखि उक्त ब्रोकरबाट आफूले पाउनुपर्ने हिसाब मिलानमा ढिलाइ हुँदै आएको अग्रवालको भनाइ छ । 

अग्रवालका अनुसार २०८१ वैशाख २३ गतेसम्मको कारोबारको आधारमा सिप्ला सेक्युरिटिजबाट ४८ करोड ३३ लाख ९८ हजार रुपैयाँभन्दा बढी रकम उनले पाउन बाँकी छ । ब्रोकरले कानूनबमोजिम समयसीमाभित्र रकम भुक्तानी नगरेकाले कानूनबमोजिम ब्याजसमेत पाउनुपर्ने माग उनको छ । आफूले पाउनुपर्ने ब्याज रकम १५ करोड रुपैयाँ भए पनि सानो अवधिका लागि ३ करोड रुपैयाँ ब्याज दिने भनी ३ वर्षसम्म आफ्नो पैसा अपचलन गरेको आरोप उनले लगाएका छन् ।

समग्रमा भुक्तानी गरी मिलान गर्न मञ्जुरी गर्दा पनि उक्त ब्रोकरले ३ करोड रुपैयाँ मात्र भुक्तानी गरेको र बाँकी रकम र ब्याज भुक्तानी नगरेको आरोप अग्रवालको छ ।

साउन ११ गते सीआईबीको रोहबरमा कागज गरी १ हप्ताभित्र भुक्तानी गरी हिसाब मिलाउँछु भनेको ब्रोकर कम्पनीले नगद भुक्तानी नगरी चेक दिएकोमा २ महीना बित्न लाग्दासमेत हिसाब मिलान हुन नसकेको अग्रवालले गुनासो गरेका छन् । आफ्नो नाममा ब्रोकर कम्पनीले काटेको चेक साट्न बैंकमा पेश गरेपछि चेक बाउन्स हुने डरले निजले आफूप्रति चेक चोरी गरेको गलत निवेदन सीआईबीमा पेश गरेको अग्रवालको भनाइ छ । आफूले पाउनुपने रकम बाँकी नभएको भए कारोबार विवरण प्रस्तुत गर्न समेत अग्रवालले विज्ञप्तिमार्फत अनुरोध गरेका छन् ।

उनले ब्रोकरविरुद्ध नेपाल स्टक एक्सचेन्ज (नेप्से) मा पनि सोमवार उजुरी दर्ता गरेका छन् । उनले आफ्नो उजुरीमा समयमै लगानीकर्तालाई भुक्तानी नगरेको र ब्रोकरको बदमासीमा नेप्सेकै केही कर्मचारीको मिलेमतो देखिएको दाबी गरेका छन् । 

ब्रोकर र लगानीकर्ताबीचको यो टकरावको विषयमा टिप्पणी गर्दै स्टक ब्रोकर एशोसिएशन अफ नेपालका अध्यक्ष धर्मराज सापकोटाले दुवै पक्ष बसेर मिलाउन सकिने विषय रहेको बताए । नियम कानूनभन्दा बाहिर गएर कारोबार गर्न नहुने मान्यता सापकोटाको छ । आपसी समझदारीमा भएको कारोबारबाट दुवै पक्षलाई समस्या आइपरेको अवस्थामा सहमतिमा मिलाएर लैजानुपर्ने उनको सुझाव छ । यो विषय एशोसिएशनमा भने छलफलका लागि आइनसकेको सापकोटाले जानकारी दिए ।