काठमाडौं । सांग्रिला होटलका संस्थापक एवं होटल संघ नेपालका पूर्वअध्यक्ष श्यामबहादुर पाण्डेको निधन भएको छ ।
१२ अक्टुवर १९३६ मा काठमाडौंको लाजिम्पाटमा जन्मिएका पाण्डेको ८८ वर्षको उमेरमा सोमवार काठमाडौंको एक अस्पतालमा उपचारका क्रममा निधन भएको हो ।
उनले सन् १९७० मा सांग्रिला होटल स्थापना गरेका थिए, जुन अहिले पाँचतारे बनिसकेको छ । मुलुकमा अन्तरराष्ट्रिय स्तरको सुविधा सम्पन्न तारे होटेल तथा रिसोर्टहरू सञ्चालन गरी अन्तरराष्ट्रिय पर्यटन प्रवर्द्धनमा योगदान दिएका भन्दै उनले राष्ट्रिय तथा अन्तरराष्ट्रिय पदक तथा सम्मान पाएका छन् ।
मुलुकको पर्यटन व्यवसायमा पुर्याएको योगदानको कदर गर्दै न्यू बिजनेश एज प्रालिले गत वर्ष आयोजना गरेको आठौं संस्करणको न्यूबिज बिजनेस् कन्क्लेभ एण्ड अवार्डस्मा उनलाई लाइफटाइम अचिभमेन्ट अवार्डबाट सम्मान गरिएको थियो ।
उनी सन् १९९१ देखि १९९३ होटल संघ नेपालको अध्यक्ष भएका थिए ।
पाण्डेको निधनप्रति होटल संघ नेपालले दुःख व्यक्त गरेको छ । संघले प्रेस विज्ञप्ति जारी गर्दै पाण्डेको निधनबाट देशले पर्यटन विकासको अभिभावक गुमाएको बताएको छ ।
