प्रभु समूह : वित्त, विप्रेषण र बीमासँगै टेलिभिजन व्यवसायमा लगानी बढाउँदै

[caption id="attachment_258785" align="alignright" width="200"] देवीप्रकाश भट्टचन,
अध्यक्ष
प्रभु समूह[/caption] प्रभु समूहले बैङ्क तथा विप्रेषण आप्रवाहसम्बन्धी कारोबार थालेको धेरै समय भएको छैन । तर पनि यो नेपालको वित्त तथा विप्रेषण बजारको पर्यायजस्तै भएको छ । वित्तीय बजारमा प्रभु समूहलाई एक विशिष्ट पहिचान भएको ब्राण्डका रूपमा हेर्ने गरिएको छ । पछिल्ला १० वर्षदेखि समूहले निरन्तर विश्वका विभिन्न स्थानमा रहेका नेपाली कामदारले आर्जन गरेको विप्रेषण नेपाल भित्र्याउने र कामदारका परिवारलाई तत्काल भुक्तानी दिने गरिरहेको छ । अहिले यो समूह बैङ्क, विप्रेषण, बीमा र टेरेस्टेरियल टेलिभिजनमा लगानी बढाउने योजनामा केन्द्रित छ । यसका लागि उसले प्रभु टीभी सञ्चालनमा ल्याएको छ । समूहले पाँच हेलिकोप्टर थपेर हवाई सेवा विस्तार गरेको छ । यसअघि समूहसँग दुई हेलिकोप्टर थिए । समूहमा विभिन्न क्षेत्रका १९ कम्पनी आबद्ध छन् । समूहको प्रभु बैङ्कले मात्रै आर्थिक वर्ष २०७३/७४ मा रू. १ अर्ब ५९ करोड खुद नाफा गरेको थियो । समूहले २ हजार ५ सयभन्दा धेरैलाई प्रत्यक्ष रोजगारी दिएको छ । समूहमा सूचना तथा प्रविधि क्षेत्रका दुई कम्पनी, तीन बैङ्क र दुई बीमा कम्पनी आबद्ध छन् । त्यसैगरी समूहले एउटा ऊर्जा आयोजना, दुईओटा हवाई सेवा प्रदायक कम्पनी र चारओटा अनलाइन कम्पनी पनि सञ्चालन गर्दै आएको छ । क्रिएशन सफ्ट नेपाल र दुईओटा टेलिभिजन सेवाप्रदायक पनि समूहअन्तर्गत नै छन् । समूहको प्रभु बैङ्कले ‘जहाँ–जहाँ नेपाली, त्यहाँ–त्यहाँ प्रभु’ नारा बनाएर ग्राहकलाई निरन्तर सेवा दिँदै आएको छ । यसले देशभरका २५ हजारभन्दा बढी बैङ्क, एजेण्ट तथा सहकारीमार्फत सीधा भुक्तानी दिन्छ । समूहले प्रभु बैङ्क, प्रभु इन्स्योरेन्स, प्रभु मनी ट्रान्सफर, प्रभु को–अपरेटिभ सर्भिसलगायत संस्थामार्फत वित्तीय सेवा दिँदै आएको छ । प्रभु समूहको प्रमुख व्यवसाय प्रभु बैङ्क विभिन्न आठओटा वित्तीय कम्पनी आपसमा गाभिएर समूहअन्तर्गतको एकमात्र वाणिज्य बैङ्क प्रभु स्थापना भएको हो । यो बैङ्कले गुणस्तरीय वित्तीय सेवा दिएर राम्रो नाफा आर्जन गर्दै आएको छ । समस्यामा परेको किष्ट बैङ्कलाई प्रभु विकास बैङ्कसँग गाभेर बैङ्कको नेतृत्व लिएको समूहले ग्राण्ड बैङ्कलाई पनि प्राप्ति गरेको छ । किष्ट बैङ्कमा सर्वसाधारणको डुब्दै गरेको रकम सुरक्षित गरेको जश पनि प्रभु बैङ्कले पाएको छ । बैङ्कले मर्जरपछिको छोटो अवधिमै आफूलाई राम्रो नाफामा लगेको छ, जसले बैङ्कप्रति आम ग्राहकको विश्वास बढेको छ । बैङ्कको सञ्चालक समिति अध्यक्ष देवीप्रकाश भट्टचन र मुख्य कार्यकारी अधिकृत अशोक शेरचन छन् ।प्रभु क्यापिटल लिमिटेड समूहले ग्रोमोर मर्चेण्ट बैङ्कलाई खरीद गरी प्रभु क्यापिटल लिमिटेडका रूपमा सञ्चालन गरेको छ । यसले पहिले शेयर निष्कासनकर्ता र पोर्टफोलियो म्यानेजमेण्ट सेवाका लागि अनुमति पाएको थियो । पछि अण्डरराइटिङको पनि स्वीकृति पाएको छ । प्रभु क्यापिटलका मुख्य प्रवर्द्धकमा ११ ओटा विकास बैङ्क, ६ ओटा वाणिज्य बैङ्क, एउटा फाइनान्स, दुईओटा निजी कम्पनी र ३७ ओटा व्यक्तिगत कम्पनी छन् ।

बीमा सेवा समूह जीवन र निर्जीवन दुवै बीमा व्यवसायमा संलग्न छ । समूहको जीवन बीमा प्रभु लाइफ इन्स्योरेन्स र निर्जीवन बीमा प्रभु इन्स्योरेन्स लिमिटेडमार्फत प्रदान हुने गरेको छ । प्रभु लाइफ २०७४ मङ्सिर २८ देखि सञ्चालनमा आएको हो । समूहको निर्जीवन बीमा कम्पनी प्रभु इन्स्योरेन्स भने २०५३ सालदेखि सञ्चालनमा छ । जीवन बीमामा अमूल्य, समृद्धि, वैभव र समृद्ध (बच्चाका) स्कीम बजारमा छन् भने निर्जीवनतर्फ अग्नि बीमा, मोटर बीमा, सामुद्रिक बीमा, व्यक्तिगत दुर्घटना बीमा, यातायात बीमालगायत १६ भन्दा बढी योजना छन् ।प्रभु मनी ट्रान्सफर प्रभु मनी ट्रान्सफर अमेरिकाका टेक्सास, फ्लोरिडा, न्यूयोर्क, पुर्टाेरिको, जर्जिया, पेन्सिल्भेनियालगायत शहरका बैङ्कबाट विप्रेषण नेपाल ल्याउने वैधानिक संयन्त्र हो । विप्रेषण कारोबारका लागि नै न्यूयोर्कमा प्रभु बैङ्कका ७ शाखा छन् । यसले दक्षिण तथा पूर्वी एशियाली देश, मलेशिया, यूएई, कतार, बङ्गलादेश, भारत र पाकिस्तानबाट पनि विप्रेषण भित्र्याउने सुविधा दिन्छ ।