सल्यान दमकलविहीन : सवारीसाधन खरीदमा चासो, दमकललाई बेवास्ता

बुद्धिमान पुन सल्यान । सल्यानका १० स्थानीय तहमध्ये कुनै पनि निकायसँग दमकल छैन । आफ्नो सुविधाका लागि सवारीसाधनमा लाखौं खर्च गर्ने स्थानीय निकायका जनप्रतिनिधिको दमकल खरीदमा ध्यान पुग्न सकेको छैन । सामुदायिक वनमा लागेको डढेलो मानव बस्तीमा आउँदा चालू आर्थिक वर्षमा मात्रै दर्जनभन्दा बढी घरगोठ जलेर नष्ट भए । ठूलो जनधनको क्षति भयो । यस्ता घटना वर्षेनि हुने गरेको छ । यस्तो विपद्को समयमा जिल्लामा एउटा पनि दमकल नहुनु दुःखद भएको छत्रेश्वरी गाउँपालिका–३ का पूर्णबहादुर पुनले बताए । जिल्लाका स्थानीय तहहरू आफ्नो लागि दुईपांग्रे र चारपांग्रे सवारीसाधन खरीदमा व्यस्त छन् । अत्यावश्यक दमकल र एम्बुलेन्स खरीदमा चासो दिएका छैनन् । बरू डाँडाकाँडा भत्काउन डोजर किन्ने होडबाजीमा स्थानीय सरकार रहेको स्थानीयको भनाइ छ । जिल्लाका अधिकांश स्थानीय तहका जनप्रतिनिधिहरूले गाउँमा खासै आवश्यकता नदेखिएकोले दमकल नकिनेको दाबी गर्दै आएका छन् । स्थानीय सरकार सञ्चालन ऐन २०७४ र विपद् जोखिम न्यूनीकरण तथा व्यवस्थापन ऐन २०७४ ले पनि प्रत्येक स्थानीय तहमा एउटा दमकल अनिवार्य हुनुपर्ने व्यवस्था गरेको छ । छत्रेश्वरी गाउँपालिकाका अध्यक्ष सन्तोष केसीले अहिले नै दमकल किन्ने सोच नभएको बताए । उनले आगामी आर्थिक वर्षको नप्ति कार्यक्रम तथा बजेटमा दमकल खरीदका जिषयमा छलफल गरेर किन्न सकिने बताए । भौगोलिक रूपमा गाउँपालिका विकट भएको र सबै क्षेत्रमा स्तरीय सडक नभएका कारण दमकल प्रयोगमा समस्या हुने उनको भनाइ छ । सल्यानका प्रमुख जिल्ला अधिकारी चूडाराज न्यौपानेले जिल्लाका विभिन्न स्थानमा आगलागीका घटनाहरू बढेकाले दमकलको आवश्यकता महसुूस गरिएको बताए । तर, दमकल खरीदका लागि कुनै तयारी भने नभएको उनको भनाइ छ ।