‘मिडिया काउन्सिल विधेयक परिमार्जन गर्नुपर्छ’

नेपालगञ्ज (अस) । नेपाल कम्युनिष्ट पार्टी (नेकपा)का वरिष्ठ नेता पूर्व प्रधानमन्त्री माधवकुमार नेपालले मिडिया काउन्सिल विधेयक विवादित बनेकाले सबैलाई मान्य हुने गरी परिमार्जन गर्नुपर्ने बताएका छन् । प्रेस संगठन नेपाल बाँकेले शनिवार नेपालगञ्जमा आयोजना गरेको पत्रकार सम्मेलनमा उनले यस्तो बताएका हुन् । उनले भने, ‘विवाद र विमति रहेकै अवस्थामा यसलाई पास गर्नुहुँदैन । सबैले अपनत्व महसुुस गर्नेगरी विधेयकलाई अघि बढाउनुपर्छ ।’ प्रेस स्वतन्त्र हुनुपर्ने धारणा राख्दै उनले भने, ‘कहीँ कतैबाट प्रेसमाथि अंकुश लगाउने काम राम्रो होइन ।’