परिसंघ, सरकार र ६ उद्योगबीच सम्झौता  : १ हजार ६६५ जना रोजगार हुँदै

काठमाडौं। कार्यस्थलमा आधारित रोजगारमूलक प्रशिक्षण कार्यक्रम (एप्रेन्टिससीप) सञ्चालनका लागि उद्योग, वाणिज्य तथा आपूर्ति मन्त्रालय अन्तर्गतको लघु, घरेलु तथा साना उद्योग प्रवर्द्धन केन्द्र, नेपाल उद्योग परिसंघ र ६ उद्योगहरूबीच सम्झौता भएको छ । माघ १४ गते भएको सम्झौतामा केन्द्रका तर्फबाट कार्यकारी अधिकृत दीपक घिमिरे, परिसंघका तर्फबाट महानिर्देशक दीपकराज जोशी र सम्बन्धित उद्योगका प्रतिनिधिहरूले हस्ताक्षर गरेका छन् ।

एप्रेन्टिससीप कार्यक्रममा सम्झौता गर्ने ६ उद्योगहरूमा लिटमस इन्डष्ट्रिज प्रालि, अरिहन्त मल्टिफाइबर्स लिमिटेड, किरण शुज म्यानुफ्याक्चर्स प्रालि, बाबा जुट मिल प्रालि, मोडर्न स्लिपर इन्डष्ट्रिज प्रालि र रन शुज इन्डष्ट्रिज प्रालि रहेका छन् । सम्झौताअनुसार यी उद्योगले एक हजार ६६५ जना प्रशिक्षार्थी कामदार छनोट गरी उनीहरूलाई कम्तीमा १८ महीना रोजगारी दिनेछन् ।

प्रशिक्षार्थी कामदारको अधिकतम तीन महीनाको पारिश्रमिक भने नेपाल सरकारका तर्फबाट केन्द्रले बेहोर्ने बताइएको छ । सम्झौता कार्यक्रममा उद्योग, वाणिज्य तथा आपूर्तिमन्त्री रमेश रिजालले उक्त कार्यक्रमको सञ्चालनबाट उद्योगको उत्पादकत्व वृद्धिमा योगदान पुग्ने र स्वदेशमै रोजगारीका थप अवसर सृजना हुने अपेक्षा गरे । साथै कार्यक्रमलाई सफलतापूर्वक सम्पन्न गर्न सम्बद्ध सबै पक्ष क्रियाशील रहनुपर्नेमा उनले जोड दिए ।

परिसंघका अध्यक्ष राजेशकुमार अग्रवालले भने, ‘चालू आर्थिक वर्षका लागि ९ ओटा उद्योगले २ हजार १०० प्रशिक्षार्थी लिन परिसंघमार्फत आवेदन दिएका थिए । यद्यपि पाठ्यक्रम तथा अन्य चुनौतीका कारण ६ ओटा उद्योगसँग मात्र सम्झौता हुन सक्यो ।’ आगामी दिनमा यस कार्यक्रमलाई थप प्रभावकारी बनाउन आवश्यक रहेको उनले बताए । यसलाई सफल बनाउन परिसंघको भूमिका सदैव सकारात्मक रहने उनको भनाइ छ ।

यस्तै, परिसंघका उपाध्यक्ष रोहित गुप्ताले आगामी वर्ष यस कार्यक्रमको लक्षित संख्यामा वृद्धि गरी सबै उद्योगहरूलाई समेट्नुपर्ने बताए । ‘सीटीईभीटीबाट मान्यता प्राप्त पाठ्यक्रम भएमा यस कार्यक्रमले अझ ठूलो उपलब्धि हासिल गर्नेछ,’ उनले भने ।

केन्द्रका कार्यकारी अधिकृत घिमिरेले दक्ष जनशक्ति विकास गरी स्वदेशमै रोजगारी सृजना गर्ने कार्यक्रमको उद्देश्य रहेको बताए । कार्यक्रमका लागि सरोकारका पक्षहरूबीच त्रिपक्षीय सम्झौता हुनु ठूलो उपलब्धि रहेको उनको भनाइ थियो । यसलाई थप सफल बनाउन सबै सरोकारवालाको भूमिका महत्त्वपूर्ण रहेको उनले बताए ।