एक महीनामा पुनर्बीमा कम्पनीका लगानीकर्ताले सर्वाधिक कमाए, अन्य समूहको सूचक १७.७३ प्रतिशत बढ्यो

काठमाडौं । पछिल्लो एक महीनामा अन्य समूहको सूचक १७ दशलमव ७३ प्रतिशत वृद्धि भएको छ । यस समूहको सूचक गत माघ २२ गते २ हजार १३६ दशमलव ४३ रहेकोमा फागुन २२ गते बढेर २ हजार ५१५ दशमलव १९ विन्दुमा पुगेको छ । 

यस समूहका दुई पुनर्बीमा कम्पनी हिमालयन रिइन्स्योरेन्स र नेपाल रिइन्स्योरेन्स कम्पनीको शेयर मूल्यमा वृद्धि भएसँगै समूहगत सूचक बढेको हो । यी दुई कम्पनीका लगानीकर्ताले सर्वाधिक कमाएका छन् । 

यी कम्पनी पूँजी वृद्धि अभियानमा रहेकाले आगामी दिनमा आकर्षक बोनस शेयर र हकप्रद शेयरमार्फत पूँजी बढाउने भएकाले लगानीकर्ताको रोजाईमा परेका हुन् । हिमालयन रिइन्स्योरेन्सले हाल कायम चुक्ता पूँजीको ८० प्रतिशत हकप्रद शेयर निष्कासन गर्ने तयारी गरेकाले र नेपाल रिइन्स्योरेन्सले पूँजी पुर्याउन हकप्रद शेयर र बोनस शेयरलाई जोड दिन सक्ने विश्वासले कम्पनीको शेयरमा लगानीकर्ताको आकर्षण परेको जानकार बताउँछन् । 

नेपाल बीमा प्राधिकरणले पुनर्बीमा कम्पनीको चुक्ता पूँजी रू. २० अर्ब पुर्याउन निर्देशन दिएको छ । नेपाल रिइन्स्योरेन्सको चुक्तापूँजी रू. १३ अर्ब ४२ करोड र हिमालयन रिइन्स्योरेन्सको रू. १० अर्ब ४० करोड रहेको छ । 

पछिल्लो एक महीनामा सर्वाधिक बढ्ने सूचकको सूचीमा दोस्रोमा वित्त समूह छ । यस समूहको सूचक ९ दशमलव ७२ प्रतिशत वृद्धि भएको छ । गत माघ २२ गते यस समूहको सूचक २ हजार ५३६ दशमलव ०५ रहेकोमा २ हजार ७८२ दशमलव ५९ पुगेको हो । 

समीक्षा अवधिमा १३ समूहगत सूचकमध्ये आठ समूहको सूचक बढेको छ । यस्तै, पाँच समूहको भने सूचक घटेको छ । तीमध्ये व्यापार समूहको सूचक सबैभन्दा बढी ३ दशमलव ४३ प्रतिशत घटेको छ । यस समूहको सूचक गत माघ २२ मा ४ हजार ४२६ दशमलव १३ रहेकोमा फागुन २२ मा ४ हजार २७४ दशमलव ४७ विन्दुमा झरेको हो । 

एक महीना अवधिमा नेप्से परिसूचक ३ दशलमव ७७ प्रतिशत वृद्धि भएको छ । गत माघ २२ मा नेप्से २ हजार ७१५ दशमलव ९१ रहेकोमा फागुन २२ मा २ हजार ८१८ दशमलव ४३ पुगेको छ । 

समूहको नाम	फागुन २२ गतेको सूचक	माघ २२ गतेको सूचक	घटबढ प्रतिशत
अन्य	2515.19	2136.43	17.73
वित्त	2782.59	2536.05	9.72
जीवन बीमा	14238.42	13229.21	7.63
लगानी	114.1	106.53	7.11
उत्पादन तथा प्रशाधेन	7616.93	7251.4	5.04
बैंकिङ्ग	1417.9	1367.54	3.68
विकास बैंक	5911.61	5868.63	0.73
लघुवित्त	5203.46	5182.11	0.41
निजीबन बीमा	13101.46	13155.44	-0.41
होटल तथा पर्यटन	6768.06	6814.36	-0.68
म्युचुअल	20.02	20.17	-0.74
जलविद्युत	3788.63	3836.51	-1.25
व्यापार	4274.47	4426.13	-3.43

स्रोत : नेप्से