आईटी बजारलाई प्रोत्साहन गर्नेछौं

सुनैना घिमिरे पाण्डे
सचिव, कम्प्युटर एशोसिएशन नेपाल महासङ्घ

अन्य बेलाको झैं यसपटकको क्यान इन्फोटेकमा सूचना तथा सञ्चारप्रविधि क्षेत्रमा विकास भएका अत्याधुनिक प्रविधिको प्रदर्शनीले निरन्तरता पाउनेछ । तर, देशको विद्यमान समस्या र परिस्थितिका कारण अहिले सूचनाप्रविधिको बजारमा पनि मन्दी आएको छ । अधिकांश व्यापार व्यवसाय ठप्प रहेको अवस्थामा उपभोक्ताको क्रयशक्तिमा समेत कमी आएको छ । यही परिस्थितिमा परिवर्तन ल्याउँदै बजारलाई पुनः सक्रिय बनाउन इन्फोटेकले गहन भूमिका निर्वाह गर्ने हामीले आशा लिएका छौं । बजारलाई पुरानै अवस्थामा पुर्‍याउन नसकिए तापनि त्यसमा केही प्रोत्साहन गर्न सकिन्छ भन्ने हाम्रो अपेक्षा छ ।

मेलामा यसपटक १ सय ८० स्टल रहनेछन् । तिनमा हार्डवेयर विक्री तथा मर्मत, पावर सोलुशन्स, मोबाइल एक्सेसरिज, डिलर तथा  डिष्ट्रिब्युटर्स, इण्टरनेट सेवा प्रदायक (आईएसपी)लगायतले आफ्ना नयाँ सेवा तथा अत्याधुनिक उत्पादन प्रदर्शनीका लागि राख्नेछन् । साथै, टेलिकम्युनिकेशन्स, आईसीटी कलेज तथा ट्रेनिङ इन्ष्टिच्युट्स, सफ्टवेयर सोलुशन्स, पेमेण्ट सोलुशन्सलगायतको पनि उत्साहजनक सहभागिता रहनेछ ।

मेलामा प्रवेशका लागि विद्यार्थीका लागि ५० प्रतिशत छूटको व्यवस्था गरिएको छ । सर्वसाधारणका लागि रू. १ सय तोकिएकोमा विद्यार्थीका लागि भने रू. ५० मा टिकटको व्यवस्था गरिएको छ । मेला अवलोकनका लागि सरकारी विद्यालयका विद्यार्थीका लागि निःशुल्क प्रवेशको व्यवस्थासमेत गरिएको छ । यसका लागि सम्बन्धित विद्यालयले अग्रिम रूपमा लिखित अनुरोधसहितको नामावली भने पठाउनुपर्नेछ । यसैका आधारमा सम्बन्धित विद्यालयका विद्यार्थीलाई प्रदर्शनीस्थलमा निःशुल्क प्रवेशको व्यवस्था गरिनेछ । मेलामा प्रवेशका लागि अनलाइन टिकटको व्यवस्था पनि मिलाएका छौं । आमजनमानसलाई सूचना तथा सञ्चारप्रविधिको प्रयोगमा प्रोत्साहन गर्नु यसको मूल उद्देश्य हा । त्यसैले, अनलाइन टिकट खरीदमा २० प्रतिशत छूटसमेत प्रदान गरीने व्यवस्था गरेका छौं । विशेष कारणवश प्रदर्शनीस्थलसम्म पुग्न नभ्याउने मानिसका लागि मेलाको लाइभ भिडियो स्ट्रिमिङको व्यवस्था पनि हामीले गरेका छौं । मेला अवधिभर ‘क्यान डट ओआरजी डट एनपी’ वा क्यानइन्फोटेक डट ओआरजी डट एनपीमा ‘लगअन’ गरी लाइभ भिडियो स्ट्रिमिङ हेर्न सकिन्छ । मेलामा प्रदर्शनी गरिने सामान तथा सेवाहरूका बारेमा उपभोक्तालाई जानकारी लिन सहजता होस् भन्ने सोचले एसएमएसबाटै तिनको बारेमा जानकारी लिन सकिने व्यवस्था मिलाएका छौं । त्यसैगरी प्रदर्शनीको अवधिभर हरेक दिन लक्की ड्रकोसमेत व्यवस्था गरिएको छ ।