अझै बढेन लगानीकर्ताको मनोबल, साताको पहिलो दिन १.९७ प्रतिशत घट्यो नेप्से

अभियान संवाददाता

चैत १८, काठमाडौं । साताको पहिलो दिन नेप्से परिसूचक १ दशमलव ९७ प्रतिशत घटेको छ । दिनभरिको कारोबारपछि अन्त्यसम्ममा परिसूचक २४ दशमलव शून्य ५ अङ्क घटेर १ हजार १ सय ९६ दशमलव २४ विन्दुमा पुगेको छ । यस दिन नेप्से कारोबारको शुरुमा १ हजार २ सय २२ दशमलव २० विन्दुमा पुगेको थियो । सो विन्दु धेरै समय टिक्न सकेन । कारोबारको दोस्रो घण्टादेखि बजार स्थिर रूपमा सामान्य घट्बढ् भएको नेप्से चित्रले देखाउँछ ।

श्वेतपत्र आएपछि लगानीकर्ताको मनोबल बढ्ने र शेयर बजार पनि उकालो लाग्ने अनुमान गरिएको थियो । शुक्रवार सार्वजानिक भएको श्वेतपत्रले समस्या के–के छन् भनेर देखाएको हो । ति समस्याको समधानका लागि डा. खतिवडाले के कस्तो नियम ल्याउँछन् भन्ने पर्खाइमा लगानीकर्ता रहेको शेयरका लगानीकर्ता सन्तोषराज बजगाँईले बताए । उनि भन्छन्, ‘बजारमा माग कम र आपूर्ति बढी, बैङ्कहरूको ब्याजदर बढी भएको छ’ । यि समस्यालाई सरकारले समाधान गर्‍यो भने बजार बढ्न सक्ने उनको बुझाइ छ । अर्थमन्त्रालय र सरोकारवालाहरु बिच पूँजीबजार सुधारको सम्बन्धमा छलफल जारी रहेको छ ।

कारोबार भएका ९ समूहको परिसूचक घटेपछि नेप्से परिसूचक घटेको हो । बीमा समूहको परिसूचक २ दशमलव ६७ प्रतिशत, जलविद्युतको २ दशमलव ५५, विकास बैङ्कको २ दशमलव ४८, बैङ्किङको २ प्रतिशतले घटेको छ । लघुवित्तको १ दशमलव ९६, होटल समूहको १ दशमलव ५३, वित्तको १ दशमलव २, ‘अन्य’ समूहको शून्य दशमलव ८४ प्रतिशत र उत्पादन तथा प्रशोधन समूहको परिसूचक शून्य दशमलव ६९ प्रतिशत घटेको छ ।

यस दिन कारोबार भएका १ सय ५७ कम्पनीको ७ हजार ७४ पटकको व्यापारमा १२ लाख ८३ हजार १३ कित्ता शेयरको रू. ३१ करोड २३ लाख बराबरको शेयर कारोबार भएको छ । नेप्सेमा उच्च कारोबार हुने १० कम्पनीमा स्ट्याण्डर्ड चार्टर्डको प्रतिकित्ता रू. ८ सय २५ मा रू. १ करोड ७० लाख बराबरको शेयर कारोबार भएको छ । तिनाउ डेभलपमेण्ट बैङ्क लिमिटेडले शेयर मूल्य ३ दशमलव ९१ प्रतिशतले बढेको छभने एनएमबि हाइब्रिड फण्ड एल १ को शेयर मूल्य ६ दशमलव ८४ प्रतिशतले घटेको छ । कारोबार भएका १ सय ५७ कम्पनीमा १७ कम्पनीको शेयर मूल्य बढेको छभने १ सय २९ कम्पनीको शेयर मूल्य घटेको छ । साथै, ११ कम्पनीको शेयर मूल्य स्थिर रहेको छ ।

प्रतिक्रिया [0]