लघुवित्त र बीमा समूहले बढायो नेप्से, १७ कम्पनीको शेयर करीब १० प्रतिशतले बढ्यो

अभियान संवाददाता

वैशाख ४, काठमाडौं । मङ्गलवार नेप्से कारोबार भएदेखि अन्त्यसम्म बढेर बन्द भएको छ । यस दिनको कारोबारपछि लगानीकर्ताहरू खुशी भएका छन् । यस दिन नेप्से २ दशमलव ५९ प्रतिशत बढेको छ । ३३ दशमलव ६१ अङ्क बढेर परिसूचक १ हजार ३ सय ३१ दशमलव १८ विन्दुमा पुगेर बजार बन्द भएको हो । कारोबार भएका १० समूहको परिसूचकमा व्यापार समूहको परिसूचक बाहेक बाँकी सबै समूहको परिसूचक बढेपछि नेप्से परिसूचक बढेको हो । लघुवित्त समूहको परिसूचक ७ दशमलव ६९ प्रतिशत, बीमा समूहको ५ दशमलव ५१ र होटल समूहको परिसूचक ४ दशमलव ४५ प्रतिशतले बढेको छ ।

यस दिन कारोबार भएका १ सय ६६ कम्पनीको १० हजार ३१ पटकको व्यापारमा १८ लाख ९५ हजार ५ सय ६ कित्ता शेयरको रू. ९५ करोड ४० लाख बराबरको शेयर कारोबार भएको छ । कारोबार भएका कम्पनी मध्ये सूर्या लाइफ इन्स्योरेन्स कम्पनीको प्रतिकित्ता रू. ९ सय ५७ मा रू. ५ करोड ९८ लाख बराबरको सर्वाधिक शेयर कारोबार भएको छ । यस दिन बीमा कम्पनी र लघुवित्त कम्पनीको शेयर धेरै कारोबार भएको छ । महिला सहयात्रा माइक्रोफाइनान्स वित्तीय संस्था लिमिटेड, प्रुडेन्सियल इन्स्योरेन्स, राष्ट्रिय बीमा कम्पनीको संस्थापक शेयरको शेयर मूल्य १० प्रतिशतले बढेको छ । साथै, १४ कम्पनीको शेयर ९ प्रतिशतभन्दा बढीले बढेको छ ।

प्रतिक्रिया [0]