न्यून अङ्कले घट्यो नेप्से, ६६ कम्पनीको शेयर मूल्य बढ्यो

अभियान संवाददाता

जेठ ७, काठमाडौं । सोमवार शेयर बजार शून्य दशमलव १५ प्रतिशत घटेको छ । कारोबार शुरु भएदेखि सुस्त रुपमा घटिरहेको शेयर बजार अन्तिम आधा घण्टामा भने सुधारिन खोजेको थियो । दिनभरी ओरालो लागेको बजारमा अन्तिम समयमा होटल, उत्पादन तथा प्रशोधन, ‘अन्य’ र लघुवित्त समूह बढेपछि परिसूचक घट्न रोकिएको हो । यस दिन परिसूचक २ दशमलव शून्य ६ अङ्कले घटेर १ हजार ३ सय ३७ दशमलव १३ विन्दुमा पुगेर टुङ्गिएको हो । कारोबार रकम बढेर रू. ३५ करोड ५४ लाख र बजार पूँजीकरणमा घटेर रू. १५ खर्ब ६९ अर्बमा सिमित रहेको छ । ‘क’ वर्गका कम्पनीहरुको कारोबार मापन सेन्सेटिभ इण्डेक्स शून्य दशमलव शून्य ५ प्रतिशतले घटेर २ सय ८२ दशमलव ११ अङ्क पुगेको छ ।

यस दिन सिटिजन इन्भेष्टमेण्ट ट्रष्टको रू. २ करोड ४१ लाख बराबरको शेयर कारोबार भएको छ । यस कम्पनीको १ सय १ पटकको व्यापारमा ८ हजार ९ सय २५ कित्ता शेयर कारोबार भएको हो । कम्पनीको शेयर मूल्य रू. ९९ ले बढेर अन्तिम मूल्य रू. २ हजार ७ सय २५ पुगेको छ । यस कम्पनीको सञ्चालक समितिको बैठकले २२ दशमलव ०६ प्रतिशत बोनस शेयर १ दशमलव १६ प्रतिशत नगद लाभांश कर प्रयोजनको लागि वितरण गर्ने प्रस्ताव गरेपछि यस कम्पनीप्रति लगानीकर्ताको आकर्षण बढेको हो । नयाँ नेपाल लघुवित्त विकास बैङ्कको मूल्य ९ दशमलव ७१ प्रतिशतले बढेर अन्तिम मूल्य रू. २ हजार २ सय ४९ पुगेको छ । राष्ट्रिय बीमा कम्पनीको शेयर मूल्य ५ दशमलव ७९ प्रतिशत घटेर अन्तिम मूल्य रू. १२ हजार ५ सय ७१ मा सिमित रहेको छ । बीमा समितिले यस बीमा कम्पनीको बोनस शेयरमा रोक लगाएको खबरले कम्पनीको शेयर मूल्यमा प्रभाव परेको हो ।

लघुवित्त कम्पनी समूहको परिसूचक २ दशमलव शून्य ६ प्रतिशत बढेको छ । अधिकांश लघुवित्त कम्पनीहरुको शेयर मूल्य बढेपछि यस समूहको परिसूचक ३५ दशमलव ८२ अङ्क बढेको हो । ‘अन्य’ समूहको परिसूचक शून्य दशमलव ६४ प्रतिशत, होटलको शून्य दशमलव ५७ प्रतिशत र उत्पादन तथा प्रशोधन समूहको शून्य दशमलव ३६ प्रतिशत बढेको छ । त्यस्तै, बीमा समूहको परिसूचक १ दशमलव १ प्रतिशत घटेको छ । साथै, जलविद्युत् समूहको परिसूचक शून्य दशमलव ४४ प्रतिशत, विकास बैङ्कको शून्य दशमलव ४१ प्रतिशत, बैङ्किङको शून्य दशमलव ३ र वित्त कम्पनीको शून्य दशमलव शून्य ९ प्रतिशत घटेको हो ।

यस दिन ६६ कम्पनीको शेयर मूल्य बढेको छ । त्यस्तै, ७३ कम्पनीको शेयर मूल्य घटेको छ भने २४ कम्पनी स्थिर रहेका छन् । सो दिन १ सय ६३ कम्पनीको ३ हजार ९ सय ८८ पटकको व्यापारमा ८ लाख ७ हजार ५ सय ३३ कित्ता शेयर किनबेच भएको छ । यस दिन नेप्सेको १४ दिने रिलेटिभ स्ट्रेन्थ इण्डेक्स न्यूट्रल जोन अथवा ५० दशमलव शून्य १ स्केलमा रहेको छ । यसले बजारमा शेयरको खरीद विक्री चाप सामान्य रहेको देखाउँछ । त्यसैगरी, सो दिन नेप्सेको एडी रेशियो शून्य दशमलव ९० अङ्क रहेको छ । यसले बजार वियरिश प्रवृत्तिमा रहेको देखाउँछ ।

प्रतिक्रिया [0]