देशभरका उत्कृष्ट कलेजहरुबीचको अवार्ड कार्यक्रम, चौथो न्यूबिज बिजनेश स्कूल रेटिङ–र्‍याङ्किङ अवार्ड २०१८ हुँदै

Jun 21, 2018

शिक्षा मुख्य खबर

अभियान संवाददाता काठमाडौं । यो वर्षको न्यूबिज बिजनेश स्कूल रेटिङ–र्‍याङ्किङ अवार्ड आगामी शुक्रवार आयोजना हुने भएको छ । कार्यक्रममा विभिन्न सात क्याटेगोरीमा छानिएका उत्कृष्ट १०/१० कलेजको घोषणा हुने आयोजक ‘न्यू बिजनेश एज प्रालि’ले जानकारी दिएको छ । यसरी हुंदैछ कार्यक्रम देशभरका १ हजार २ सय ७४ व्यवस्थापन कलेज मध्येबाट शुरू भएको छनोट प्रक्रिया विभिन्न चरण पार गर्दै अघि बढेको थियो । तथ्याङ्क सङ्कलन, सम्बन्धित कलेजमार्फत तथ्याङ्क आह्वानका साथै विज्ञ सम्मिलित छनोट समितिको विज्ञतासमेत समेटेर उत्कृष्ट कलेजहरू छानिएको संस्थाका अध्यक्ष मदन लम्सालले जानकारी दिए । अघिल्ला वर्षहरूमा जस्तै विषयगत क्याटेगोरीमा यो वर्ष पनि उत्कृष्ट कलेजहरू घोषणा हुनेछन् । साथै, प्रदेशगत उत्कृष्ट कलेज छनोट यो वर्षको थप आकर्षण रहेको छ । देशभरिका बिजनेश कलेज सहभागी हुने उक्त अवार्ड कार्यक्रममा देशका ख्यातिप्राप्त बिजनेश हाउस तथा शैक्षिक क्षेत्रका व्यक्तित्वको उपस्थिति रहनेछ । योपटक पनि एभरेष्ट बैङ्क लिमिटेड प्रायोजक र ओमान एयर सह–प्रायोजक छन् । त्यस्तै, मिडिया पार्टनर सौजन्य मिडिया रहेको छ । अवार्डको इतिहास सन् २०१३ देखि प्रारम्भ भएको उक्त अवार्डको यो वर्ष चौथो संस्करण हो । यसअघि सन् २०१३ र २०१४ मा नियमित रूपमा सम्पन्न भएको उक्त कार्यक्रम भूकम्प तथा विविध कारणले बीचमा २ वर्ष आयोजना हुन सकेको थिएन । गत वर्षदेखि पुनः निरन्तरता पाएको कार्यक्रम अघिल्ला वर्षहरूबाट प्राप्त सिकाइ कार्यान्वयन गर्दै यो चरणसम्म ल्याइएको आयोजक संस्थाका अध्यक्ष मदन लम्सालले बताए ।