सरकारले पनि र्‍याङ्किङ कार्यक्रम गर्नुपर्छ

Jun 26, 2018

न्यूबिज बिजनेश स्कूल अवार्ड २०१८

आर्थिक अभियान एसईईको परीक्षा प्रकाशित हुने समयमा नजीकिँदै गर्दा बिजनेश स्कूलको नाममा अवार्ड वितरण गर्नु विद्यार्थी आकर्षणको माध्यम हो कि भन्ने मेरो बुझाइ थियो । तर, यहाँ आएर बुझ्दा त्यसो होइन रहेछ । यो एमबीए, बीबीएलगायत बिजनेश कलेजलाई प्रोत्साहन कार्यक्रम भएको थाहा पाउँदा खुशी लाग्यो । र्‍याङ्किङका आधारमा न्यू बिजनेश एज प्रालिबाट पुरस्कृत सबैलाई बधाई छ । र्‍याङ्किङ हुनु ठूलो विषय होइन, तर यसको स्तर दिगो रूपमा जोगाइराख्नु महत्त्वपूर्ण हो । र्‍याङ्कमा पुरस्कार प्राप्त गरेका कलेजले सोही आधारमा काम गर्न सकून् । सन् १५०० मा स्थापना भएको अक्सफोर्ड युनिभर्सिटी अहिलेसम्म आइपुग्दा क्याम्ब्रिजको तुलनामा र्‍याङ्क तलमाथि भएको छैन । अन्तरराष्ट्रियस्तरमा पनि शैक्षिक क्षेत्रको र्‍याङ्क छ । तर, हामी त्रिभुवन युनिभर्सिटीलाई १ हजारभित्र पनि पार्न सक्तैनौं । त्यसैले, अहिले बिजनेश स्कूल अवार्ड पाएका कलेजहरूको र्‍याङ्क २ वा ३ मा नघटोस्, यो स्तर कायमै होस् । हाम्रो देशमा सरकारी तहबाटै विश्वविद्यायको आफ्ना सम्बन्धन प्राप्त, अनुमति दिएका कलेजहरूको विश्वविद्यालय अनुदान आयोगले पनि यस्ता खालका र्‍याङ्किङ गर्ने हो भने आम जनमानसलाई थाहा हुन्थ्यो । यहाँ निजी सङ्घसंस्थाले यस्तो कार्यक्रमको चलन बसालेका छन् । अब यस्तो जानकारी दिन सरकारी कार्यालयले र्‍याङ्किङ गर्नुपर्छ । शिक्षकले पनि कुन विद्यार्थी कुन र्‍याङ्कमा छ भन्ने थाहा पाउनुपर्छ । मलेशियामा र्‍याङ्किङको व्यवस्था छ । यसका लागि त्यहाँ औपचारिक खालका कार्यक्रम चलाइन्छ । नेपाल सरकारले पनि यस्तो कार्यक्रम गर्दा राम्रो हुन्छ । म अब यसबारे कुरा उठाउँछु ।