थोरै बढेको बजारमा शेयर विक्री गर्न लगानीकर्ता आतुर

अभियान संवाददाता

असार १८, काठमाडौं । सोमवार नेप्से परिसूचक शून्य दशमलव ४१ अङ्कले घटेर बन्द भएको छ । १ हजार १ सय ८४ विन्दबाट शुरु भएको कारोबार एक घण्टाको बीचमा घटेर १ हजार १ सय ७४ विन्दुसम्म पुगेको थियो । सो पछि एक घण्टाको अवधिमा १ हजार १ सय ७४ देखि ७६ विन्दुको वरिपरिमा रहेको नेप्से एक्कासी बढेर १ हजार १ सय ८६ विन्दुसम्म पुगेको थियो । सो विन्दुमा धेरै समय टिक्न नसकि अन्त्यमा ४ दशमलव ८२ अङ्कले घटेर १ हजार १ सय ७९ दशमलव ७१ विन्दुमा पुगेर बन्द भएको छ । बढेको मौकामा केहि लगानीकर्ताहरुले शेयर विक्री गर्न थालेपछि बजार पुनः घट्न थालेको लगानीकर्ताको अनुमान छ ।

कारोबार भएका नौ समूहको परिसूचकमा होटल समूहको परिसूचक शून्य दशमलव १२ प्रतिशत र विकास बैङ्कको शून्य दशमलव २७ प्रतिशतले बढेको छ । बाँकी समूहको परिसूचक घटेको छ । जलविद्युतको सबैभन्दा बढी शून्य दशमलव ९३ प्रतिशतले घटेको हो । कारोबार भएका १ सय ५९ कम्पनीको ३ हजार २ सय १८ पटकको व्यापारमा ६ लाख ७२ हजार १ सय ३ कित्ता शेयरको रू. २० करोड ४५ लाख बराबरको शेयर कारोबार भएको छ ।

नेप्सेमा सर्वाधिक कारोबार हुने १० कम्पनीमध्ये ग्लोबल आइएमई बैङ्कको प्रतिकित्ता रू. २ सय ८४ मा रू. १ करोड ७५ लाख बराबरको सर्वाधिक शेयर कारोबार भएको छ । सर्वाधिक कारोबार हुनेमा बैङ्कहरू परेका छन् । उन्नती माइक्रोफाइनान्सको शेयर मूल्य ६ प्रतिशतले बढेको छभने रैराङ् हाइड्रोपावर डेभलपमेण्टको शेयर मूल्य ७ दशमलव ३० प्रतिशतले घटेको छ । कारोबार भएका १ सय ५९ कम्पनीमा ५८ कम्पनीको शेयर मूल्य बढेको छभने ७८ कम्पनीको शेयर मूल्य घटेको छ । साथै, २३ कम्पनीको शेयर मूल्य स्थिर रहेको छ ।

प्रतिक्रिया [0]