नेशनल मेडिकल कलेजलाई ‘फाईदा’ हुने गरी वीरगञ्ज महानगरको कर निर्धारण

अभियान संवाददाता

असार २१, वीरगञ्ज । वीरगञ्ज महानगरपालिकाको कर निर्धारणले नेशनल मेडिकल कलेजलाई फाईदा पुगेको छ । महानगरको दोस्रो नगरसभाले मेडिकल कलेजका लागि यसअघि तय भएको करको आधामात्र तिरे पुग्ने गरी कर निर्धारण गरेको हो । सञ्चालनको डेढ दशकदेखि कर तिर्न अटेर गर्दै आएको कलेजलाई महानगरको यही असार १० देखि जारी सभाले ४ करोड ९४ लाख रुपैयाँ कर तिरे पुग्ने गरी निर्णय गरेको छ । यसअघि महानगरले नै मेडिकल कलेजले ९ करोड २ लाख ४७ हजा रुपैयाँ कर तिराउन विभिन्न निकायमा पत्राचार गरेको थियो । यो २ वर्षअघिको कर भएकाले अहिले नियमित कर र जरीवानासमेत गरी १० करोड रुपैयाँभन्दा माथि पुग्ने दाबी महानगरको लेखा शाखाका एक कर्मचारीले गरे । कर्मचारीले महानगर सञ्चालन गर्दा निर्धारण गरिएको कर जनप्रतिनिधि आएपछि पुनःनिर्धारण गरी घटाइएको हो । यसअघि महानगरका तत्कालिन कार्यकारी अधिकृत विष्णु कोइरालाले कलेजलाई १ करोड ३५ लाख रुपैयाँ कर तिराएका थिए । अहिले नगरसभाबाट कर तय भएलगत्तै कलेजले पहिला तिरेको रकमसमेत समायोजन हुने गरी कसम्पूर्ण कर बुझाइसकेको छ । करमध्ये पछिल्लो ४ वर्षको एकीकृत सम्पत्ति र त्यसअघिको व्यवसाय कर रहेको महानगरले बतायो । महानगरपालिकाका प्रुमख विजयकुमार सरावगीले तत्कालिन कर्मचारीले मनोमानीरुपमा कर तोकिदिएकोमा अहिले नगरसभाबाट उचित कर निर्धारण भएको बताए । ‘पहिला हचुवा पारामा कर तोकिएको रहेछ । हामीले कर निर्धारण समिति बनाएरै टुङ्गो लगाएका हौं,’ सरावगीले आर्थिक अभियानसित भने । उनले कलेजलाई फाइदा पुग्ने गरी नभएर उचित कर लिएको दाबीसमेत गरे । २०६० सालदेखि वीरगञ्जको भेडियाहीमा सञ्चालनमा आएको कलेजले कर तिर्न अटेर गर्दै आएको थियो । कर निर्धारणका लागि पटकपटक कलेजमा पुगेका कर्मचारीलाई गेटबाट छिर्नै नदिएपछि महानगरले गुगल म्यापका आधारमा कर तोकिदिएको थियो । तर, उसले कर तिरेको थिएन । तत्कालिन अधिकृत कोइरालाले दबाब दिएर पछि फछ्र्यौट हुने गरी १ करोड ३५ लाख रुपैयाँ तिराएका थिए । अहिले कलेजको सम्पत्ति स्वघोषणाका आधारमा कर लगाइएको हो । नगरमा जनप्रतिनिधि आएपछि कलेजले पुनः कर निर्धारणको माग गर्दै निवदेन दिएको थियो । वर्षौसम्म कर्मचारीलाई हाताभित्र छिर्नसमेत नदिएको कलेजले महानगरले कर निर्धारण नगरिदिएको भन्दै अख्तियारसमेत गुहारेपछि अख्तियारले महानगरलाई कर तोक्न निर्देशन दिएको थियो । महानगरको गत माघमा सम्पन्न पहिलो नगरसभाले उपप्रमुख शान्ति कार्कीको संयोजकत्वमा ३ सदस्यीय कर निर्धारण समिति बनाएकोमा समितिको प्रतिवेदनका आधारमा दोस्रो सभाले टुङग्याएको सरावगीले बताए । कलेजका प्रबन्ध निर्देशक बसुरुद्धिन अन्सारी नेकपा एमालेबाट महानगरमा मेयरको प्रत्यासी थिए । महानगरको प्रमुखको उम्मेदवार प्रबन्ध निर्देशक रहेको कलेजले करोडौं कर नतिरेको भन्दै आलोचना हुन थालेपछि अन्सारीले मनोनयनको मुखमा कलेजबाट अलग भएको घोषणा गरेर चुनावी मैदानमा उत्रिएका थिए । चुनावी प्रतिस्पर्धामा उनी सरावगीसित पराजित भएका थिए ।

प्रतिक्रिया [0]

पुरा नाम: *

इमेल: *

प्रतिकृया: *
पठाउनुहोस