arthik abhiyan
ad banner

अमेरिकामा मृगौला प्रत्यारोपणमा नयाँ नीति घोषणा

Jul 11, 2019
स्वास्थ्य र जीवन शैली अन्तरराष्ट्रिय
Image Not Found
author avatar Narahari Acharya
असार २६, वासिङ्टन । अमेरिकी राष्ट्रपति डोनाल्ड ट्रम्पले बुधवार एक कार्यकारी आदेशमा हस्ताक्षर गर्दै आगामी सन् २०३० सम्ममा अमेरिकामा २५ प्रतिशतले मृगौला रोगीको संख्यामा कमी ल्याउने घोषणा गरेका छन् । अमेरिकी सरकारले मृगौला प्रत्यारोपणमा नयाँ र सरल नियम ल्याउने तयारी गरेको छ । अमेरिकी खाद्य तथा औषधि प्रशासनबाट कृत्रिम मृगौला प्रत्यारोपणका लागि स्वीकृति प्राप्त भएमा स्वास्थ्य क्षेत्रमा थप प्रगति हुने अमेरिकी प्रशासनको विश्वास छ ।  स्वास्थ्य तथा मानव संशाधन मन्त्री अलेक्स अजारले राष्ट्रपतिको आदेशको मुख्य लक्ष्य नै सन् २०३० सम्ममा प्रत्यारोपणका लागि मृगौलाको संख्या वृद्धि गर्ने रहेको जानकारी दिए । राष्ट्रपतिको आदेशमा घरमै बसीबसी डायलासिस सेवा वृद्धि गर्ने योजनामा नवीन प्रविधिको खोजी गर्नु पनि रहेको छ । मेडिकल सेन्टरमा उपचार गर्नुभन्दा घरमै कम खर्चिलो विधिबाट डायलासिस सेवा उपलब्ध गराउनु पनि राष्ट्रपतिको आदेशले जोड दिएको छ । राष्ट्रपति ट्रम्पले हाल करीब १२ प्रतिशतले मात्र घरमै डायलासिस सेवा लिइरहेको पनि जानकारी दिए । संयुक्तराज्य अमेरिकामा करीब ३ करोड ७० लाख मानिस मृगौला रोगबाट थलिएका छन् र त्यसमध्ये करीब ७ लाख २६ हजार अन्तिम चरणको मृगौला रोगी रहेका छन् । करीब १ लाख अमेरिकीहरु मृगौला प्रत्यारोपणको पर्खाइमा रहेका र १ लाखभन्दा बढीले हरेक वर्ष डायलासिस सेवा आरम्भ गर्दछन् । अमेरिकी ह्वाइट हाउसको विवरण अनुसार डायलासिस सेवा शुरु गरेका आधाभन्दा बढीको पाँच वर्ष नपुग्दै मृत्यु हुने गरेको छ । रासस/ सिन्ह्वा
प्रतिक्रिया दिनुहोस्