arthik abhiyan
ad banner

उत्पादनशील क्षेत्रको लगानीमा प्राथमिकता दिएका छौं

Sep 4, 2019 
अन्तरवार्ता
Image Not Found
नवीन सुवेदी, प्रमुख कार्यकारी अधिकृत, सप्तकोशी डेभलपमेन्ट बैंक

विराटनगरमा कर्पोरेट कार्यालय रहेको सप्तकोशी डेभलपमेन्ट बैंक प्रदेशस्तरको बैंक बन्ने तयारीमा छ । बैंकले क्षेत्रीय स्तरको सक्षम र सबल बैंकको रूपमा आफ्नो पहिचान बनाइरहेको छ । प्रदेश नं १ को पहाडी र तराईका सात जिल्लामा आफ्ना २८ शाखा कार्यालयमार्फत बैंकिङ सेवा दिइरहेको छ । प्रस्तुत छ, बैंकको वित्तीय अवस्था, लगानीको सम्भावना, चुनौती लगायत विषयमा आर्थिक अभियानकी मोरङ संवाददाता रोशनी भट्टराईले डेभलपमेन्ट बैंकर्स एशोसिएशनका सदस्य समेत रहेका सुवदीसँग गरेको कुराकानीको सार :

सप्तकोशी डेभलपमेन्ट बैंकको वित्तीय अवस्था कस्तो छ ?
बैंकको अवस्था राम्रो थियो । भर्खरै काबेलीसँगको मर्जरले अझ राम्रो भएको छ, जुन कुराको पुष्टि नियमित रूपमा प्रकाशन गर्ने वित्तीय सूचकांकबाट पनि हुन्छ । हाल बैंकको चुक्तापूँजी लगभग ८० करोड रुपैयाँ छ । निक्षेप करीब रू. २ अर्ब ८० करोड र कर्जा करीब २ अर्ब ५५ करोड रुपैयाँ पुगेको छ ।

गत आवमा ५ करोड ८५ लाख रुपैयाँ सञ्चालन मुनाफा रहेकोमा आव २०७५/७६ मा लगभग १० करोड ४४ लाख रुपैयाँ भएको छ । बैंकको निष्क्रिय कर्जा पनि कम छ । बैंकका शेयरधनी २५ हजार पुगेका छन् भने कुल १८५ जना कर्मचारी, ७४ हजार निक्षेपकर्ता र ६ हजार ऋणी पुगेका छन् ।

बैंकको शाखा बढाउन जोड दिनुभएको छ, किन ?
नेपाल राष्ट्र बैंकले तोके बमोजिमको पूँजी हकप्रद शेयर जारी गरी पु¥याइयो । बैंकले उचित प्रतिफल दिन र व्यवसाय वृद्धिका लागि पनि शाखा बढाउनैपर्ने भयो । सोहीअनुरूप हालको नेपाल राष्ट्र बैंक नीतिगत व्यवस्थानुसार प्रदेश स्तरको विकास बैंक बनाउन लागिपरेका छौं ।

भर्खरै साविक माउन्ट मकालु डेभलपमेन्ट बैंकलाई प्राप्ति गरी बनेको साविकको काबेली विकास बैंकसँग मर्जर गरी सात जिल्लामा शाखा सञ्जाल पु¥याएका छौं ।
हाल २८ शाखा कार्यालयमार्फत वित्तीय कारोबार सञ्चालन गरिरहेका छौं । प्रदेश नं १ को पहाडदेखि  तराईसम्म वित्तीय पहुँच विस्तारका लागि नयाँ शाखा कार्यालय बढाउँदै गएका छौं ।

आधुनिक बैंकिङ सेवाका लागि के कस्ता प्रविधि प्रयोगमा ल्याउनु भएको छ ?
हामीले आधुनिक बैंकिङ सेवा सुविधाहरूमा एसएमएस बैंकिङ, मोबाइल बैंकिङ, सी–आस्बा, आईपीएस, क्यूआर कोडको सुविधा दिएका छौं । निकट भविष्यमा एटीएम सुविधा पनि दिने तयारी  छ ।

अहिले बैंकिङ क्षेत्रमा देखिएको प्रतिस्पर्धालाई कसरी लिनुहुन्छ ?
वास्तवमा बैंकिङ क्षेत्रमा प्रतिस्पर्धा धेरै छ । स्वस्थ प्रतिस्पर्धा हुनु हामी सबैलाई राम्रो नै हुन्छ । तर वित्तीय विकास तथा स्थायित्वलाई नकारात्मक असर पुग्नेगरी अस्वस्थ प्रतिस्पर्धा हुनु हुँदैन । यसले सम्रग बैंकिङ क्षेत्रलाई राम्रो गर्दैन । यद्यपि प्रदेश नं १ का विकास बैंकहरू यस मामिलामा संयमित भएर अगाडि बढेका छन् ।

मर्जपछि बैंकको अवस्था कस्तो छ ?
साविकको काबेली विकास बैंकले माउन्ट मकालु डेभलपमेन्ट बैंकलाई प्राप्ति गरेको १ वर्षभित्रै दुई बैंकबीच मर्जर सम्पन्न भयो । यो चुनौतीपूर्ण रहे पनि मर्जरको अनुभव तथा बैंकका सञ्चालक समिति, शेयरधनी र उच्च व्यवस्थापनको कुशल नेतृत्वले प्रदेश स्तरको बैंक बन्ने मुख्य लक्ष्य राख्दै मर्जर सहज रूपमा सम्पन्न गरेका छौं । मर्जर अघि र मर्जर पछाडि हेर्दा कर्मचारीको उत्साहमा कुनै कमी देखिँदैन । परिणामस्वरूप हाम्रो व्यवसायमा पनि उल्लेख्य वृद्धि भइरहेको छ । कार्यक्षेत्र ५ जिल्लाबाट ७ जिल्ला पुगेको छ । कर्मचारी, शेयरधनी तथा ग्राहक संख्यामा भएको वृद्धि र सबैको सहयोग तथा शुभेच्छाले बैंक आज यो अवस्थामा आउन सफल भएको हो ।

कर्जा लगानीका लागि कुन क्षेत्रलाई प्राथमिकता दिनु भएको छ ?
कर्जा लगानीलाई उत्पादशील क्षेत्रमा प्राथमिकता दिएका छौं । उत्पादनशील क्षेत्रमा गत आवको भन्दा लगानी बढेको छ । हामीले कृषि, व्यापार व्यवसाय, उद्योग, साना मझौला उद्योग, विपन्न क्षेत्र र सहुलियतपूर्ण कर्जा आदिमा प्राथमिकता दिएका छौं ।

बैंक तथा वित्तीय संस्था कसरी बलियो बनाउन सकिन्छ ?
मानव संसाधनको कुशल व्यवस्थापन, संस्थागत सुशासन, आधुनिक बैंकिङ प्रणालीद्वारा ग्राहक सेवा, स्रोतसाधनको अधिकतम सदुपयोग तथा प्रभावकारी आन्तरिक नियन्त्रण प्रणालीलाई अवलम्बन गर्न सकेमा बैंक तथा वित्तीय संस्था सबल हुन्छन् ।

बैंकिङ क्षेत्रमा कस्ता चुनौतीहरू देख्नु भएको छ ?
मानव संसाधनको व्यवस्थापन, अस्थिर ब्याजदर, आधुनिक बैंकिङ प्रणालीमा नवीनतम प्रविधिको प्रयोग, अस्वस्थ प्रतिस्पर्धा, सञ्चालन जोखिम आदि मुख्य चुनौती छन् ।

बैंकको अबको लक्ष्य के छ ?
प्रदेश नं १ को सबल, सक्षम र ग्राहकको रोजाइको बैंक बन्ने नै हाम्रो मुख्य लक्ष्य छ । यसका लागि बैंकले मर्जर र एक्विजिशनको विकल्प पनि खुला राखेको छ ।

प्रतिक्रिया दिनुहोस्