arthik abhiyan
ad banner

सार्वजनिक यातायातमा पहिलो पटक विद्युतीय बस चल्ने, सोमवार गौशालाबाट उद्घाटन

Sep 8, 2019 
समाचार यातायात
Image Not Found
author avatar काशीराम बजगाईं

भदौ २२, काठमाडौं । काठमाडौं उपत्यकामा पहिलोपटक सार्वजनिक यातायातको रूपमा विद्युतीय बस चल्ने भएका छन् । सोमवारदेखि सुन्दर यातायात प्रालिले चिनियाँ कम्पनी बिएकेले उत्पादन गरेका बीएके ब्राण्डका ४० सिट क्षमताका बस चलाउन लागेको हो ।

कम्पनीले ७ ओटा बस सञ्चालन गर्ने तयारी गरेपनि हाललाई ४ बस मात्रै चल्नेछन् । सोमवार उपप्रधान एवम् रक्षामन्त्री ईश्वर पोखरेलले गौशाला चोकमा बसको उद्घाटन गर्नेछन् । उद्घाटनपछि सोमवार दुईओटा बस चाबहिल र दुईओटा बस एयरपोर्ट हुँदै चक्रपथमा चल्ने कम्पनीका अध्यक्ष भेष बहादुर थापाले बताए । सुन्दर यातायातका बसहरु चक्रपथ परिक्रमा, नारायणथान–मेडिसिटी अस्पताल, गोंगबु–सल्लाघारी र ढुंगेअड्डा–जोरपाटी गरी चार ओटा रुटमा चल्नेछन् । बाँकी तीन बस अन्य रुटमा चल्ने र रुट पर्मिटको काम भइरहेको उनले बताए ।

कम्पनीले चार्जिङ स्टेशन र करसहित प्रतिबस रू. १ करोड ६५ लाख लागतमा बस खरीद गरेको हो । कम्पनीले बीएकेकै लगानीमा बस सञ्चालनका लागि सकेधारा, सितापाइला र चाबहिलमा चार्जिङ स्टेशन निर्माण गरेको छ । कम्पनीले गत सातादेखि चार्जिङ स्टेशन सञ्चालनमा ल्याइसकेको छ ।

आगामी १ महीनामा थप ११ र त्यसपछि सातओटा थपी यही वर्षभित्र कम्पनीले २५ ओटा बस सञ्चालन गर्ने योजना बनाएको छ । अध्यक्ष थापाकाअनुसार बसमा कार्डमार्फत यात्रा गर्न सकिने छ भने गाडी भाडा अन्य बसभन्दा २५ प्रतिशतसम्म सस्तो हुनेछ ।

यसअघि २०७५ कात्तिक ६ गते प्रधानमन्त्री केपी शर्मा ओलीले बिवाईडीका पाँचओटा विद्युतीय बसको उद्घाटन गरेका थिए । यद्यपि, ती बस सञ्चालनमा आएका छैनन् । एशियाली विकास बैंक (एबीडी)को आर्थिक सहयोगमा पर्यटन मन्त्रालयअन्तर्गत ल्याइएका ती बसमा प्राविधिक त्रुटी देखाउँदै सरकारले ती बस सञ्चालन गरेको छैन । बस अहिले कम्पनीको नेपालका लागि आधिकारिक विक्रेता सिमेक्स इन्क प्रालिको ग्यारेजमा थन्किएका छन् ।

प्रतिक्रिया दिनुहोस्