ई –पेपर | विज्ञापन | ग्राहक बन्नुहोस | Podcast |
arthik abhiyan
Tvs Raider

फास्ट ट्र्याक सेनालाई दिँदा झनै महँगो

२०७८ माघ, २७  
पाठक विचार
NA

काठमाडौंलाई तराई मधेससँग जोड्ने छोटो बाटो फास्टट्र्याकको निर्माणको जिम्मेवारी नेपाली सेनालाई दिएर सरकारले निकै गलत गरेको देखिएको छ । भारतीय कम्पनीलाई बनाउन दिँदा व्यापक विरोध भएपछि नेपाली सेनालाई त्यसको जिम्मेवारी दिइएको थियो । जनताको आलोचनाबाट डराएर भारतीय कम्पनीलाई काम नदिँदा अहिले यो आयोजना निकै महँगो पर्ने देखिएको छ । भारतीय कम्पनीलाई करीब ३ अर्बमा ठेक्का दिँदा कमिशन खाएको तथा भारतलाई रिझाउन यसो गरिएको भनेर व्यापक आलोचना भएको थियो । तर, सेनालाई ठेक्का दिएपछि यी सबै विवाद हटे ।

सेनाले राम्रो काम गरेको भनेर कतिपयले प्रशंसा पनि गरे र तर ‘एस्सप्रेसवे’ बनाउने अनुभव नेपाललाई नभएको अवस्थामा सेनाले त्यस्तो बाटो बनाउन सक्दैन भन्ने आवाज नउठेको पनि होइन । तर, त्यति बेला कसैले पनि यस विषयमा ध्यान दिएनन् । अहिले आएर सेनाले बढी बजेट माग्दै गएपछि भने अर्थमन्त्रालय र सेनाबीच जुहारीजस्तै चल्न थालेको छ ।

राष्ट्रिय गौरवको आयोजनाका लागि बजेटको अभाव हुन नदिने बताए पनि यथार्थमा आधारित योजना लिएर आउन सुझाव दिएबाट अर्थ मन्त्रालय प्रगतिप्रति असन्तुष्ट देखिएको बुझिन्छ । आयोजनाको कामको प्रगति हेरेर बजेटको व्यवस्था गर्ने अर्थको भनाइ छ । तर, सेनाले जति समयमा आयोजना गर्नुपर्ने हो त्यो बन्ने छाँटकाँट छैन । डीपीआर बनाउन नै समय लागेको तथा कठिन खालको निर्माणका लागि ठेक्का गर्न ढिला भएको जस्ता कुराले समयका काम हुन नसकेको सेनाको भनाइ पाइन्छ । तर, भनाइ जे भए पनि यो आयोजनाको लागत पनि अन्य आयोजनाको जस्तै निकै बढ्ने र समयमा सम्पन्न हुन नसक्ने स्पष्ट देखिएको छ ।

विदेशी कम्पनीलाई खासगरी भारतीय कम्पनीलाई काम गर्न दिँदा राष्ट्रवादको नारा उचालेर अनेक किसिमले विरोध गर्ने गरेको पाइन्छ । अहिले अमेरिकी सहयोग एमसीसीमा पनि यस्तै भइरहेको छ । तर, यसो गर्दा नेपालको विकास निर्माणले गति लिन सकेको छैन भने आयोजनाहरू निकै सुस्त गतिमा अघि बढेका छन् ।

मोहन अधिकारी
कलंकी, काठमाडौं ।

Aarthik Abhiyan Viber Community
प्रतिक्रिया [0]

   

Riddhi Siddhi Cement