साल्ट ट्रेडिङ कर्पोरेशन : कम्पनी विश्लेषण (मंगलवार, २५ असोज २०७९)

२०७९ असोज, २५

लगानी कम्पनी विश्लेषण

अभियान संवाददाता

धितोपत्र दोस्रो बजारमा व्यापारिक समूह अन्तर्गत सूचीकृत यस कम्पनीको नियमित शेयर कारोबार भैरहेको छ । यस कम्पनीले गत वर्ष भने हालसम्मकै कम १० दशमलव ५ प्रतिशत लाभांश वितरण गरेको थियो । यस वर्षको लाभांश भने कम्पनीले हालसम्म सार्वजनिक गरेको छैन् । गत आर्थिक वर्षको चौथो त्रैमाससम्म कम्पनीले रू. ३ करोड ७७ लाखभन्दा बढी खुद नाफा गरेको छ । अघिल्लो वर्षको सोही अवधिसम्मको तुलनामा कम्पनीको खुद नाफा २१ दशमलव १५ प्रतिशत कम भएको हो ।

अघिल्लो वर्ष यस अवधिसम्म कम्पनीले रू. ४ करोड ७९ लाखभन्दा बढी खुद नाफा गरेको थियो । गत वर्ष कम्पनीको विक्री आम्दानी ३१ प्रतिशत कम भएकाले पनि खुद नाफामा असर परेको हो । कम्पनीले अघिल्लो वर्ष रू. १० अर्ब ४० करोडभन्दा बढी विक्री आम्दानी गरेकोमा गत वर्ष रू. ७ अर्ब १७ करोडभन्दा बढी मात्र यो आम्दानी गरेको हो । दोस्रो बजारमा कम्पनीको शेयरमूल्य प्रतिकित्ता रू. ३ हजार ५०० रहेको छ । सोमवार कम्पनीको शेयरमूल्य प्रतिकित्ता रू. १५ ले घटेको हो ।

निष्कर्ष
कम्पनीको ६४ दिनको कारोबार अवधिको अन्तिम दिनमा वियरिश प्रवृत्तिको मैनबत्ती बनेको छ । यस्तो आकृतिले बजारमा आगामी दिनमा कम्पनीको शेयरमूल्य घट्दो अवस्थामा रहने संकेत गर्छ । तर उक्त दिनको मैनबत्तीमा देखिएको लामो पुच्छरले आगामी कारोबार दिन बजार हालको प्रवृत्तिभन्दा रिभर्स रियाक्ट गर्ने देखाउँछ । आरएसआई न्युट्रल जोन ३७ दशमलव ६९ विन्दुमा छ । यसले शेयर खरिदबिक्री चाप सन्तुलनमा रहेको देखाउँछ । कम्पनीको स्ट्यान्डर्ड डेभिएशन ९ दशमलव ७४ विन्दुमा छ । उतारचढाव न्यून रहेको देखाउँछ । यस्तो अवस्थामा जोखिम कम हुन्छ भने प्रतिफल पनि कम हुने गर्दछ ।

त्यस्तै कम्पनीको मुभिङ एभरेज २६ दिने औसत मूल्यरेखा र १४ दिने औसत मूल्यरेखा एकअर्कामा टाढा छन् भने हालको मूल्यरेखा यी दुबै मूल्यरेखा भन्दा तल छ । सोमवारको शेयरमूल्य रू. ३ हजार ५०० देखि बजारको अवस्था परिवर्तन भई मूल्य महँगिएमा रू. ३ हजार ६८८ मा प्रतिरोध पाउने देखिन्छ भने मूल्य सस्तिएमा रू. ३ हजार ४५० मा पहिलो टेवा पाउने देखिन्छ ।

सावधानी : हामीले उपलब्ध तथ्याङ्कको अधारमा गरेको विश्लेषण आफैमा पुर्ण होइन, लगानीकर्ताले लगानी गर्नु पूर्व कम्पनीको समग्र आधारभुत पक्ष र प्राविधिक पक्ष हर्नु आवश्यक रहेको छ ।