ई –पेपर | विज्ञापन | ग्राहक बन्नुहोस | Podcast |
arthik abhiyan
riddhi siddhi

ब्रोडब्याण्ड परियोजनाका १८ ओटै प्याकेजको जडान सकियो, १६ हजार २०८ संस्थाले पाए इन्टरनेट 

२०७९ मंसिर, १८  
प्रविधि
Tvs Raider Image Not Found
author avatar अभियान संवाददाता

काठमाडौं । ग्रामीण दूरसञ्चार विकास कोष प्रयोग गरी सञ्चालन भइरहेको ब्रोडब्याण्ड परियोजनाअन्तर्गत १८ ओटै प्याकेजको जडान कार्य सम्पन्न भएको नेपाल दूरसञ्चार प्राधिकरणले जनाएको छ । 

प्राधिकरणका अनुसार जडान सम्पन्न भएकामध्ये १० ओटा प्याकेजको मनिटरिङ र भेरिफिकेशनसमेत सकिएको छ भने ८ ओटा प्याकेजमा फेज-थ्री को काम पनि अन्तिम चरणमा छ । परियोजनाअन्तर्गत ७०८ स्थानीय  निकायका ५ हजार ९३३ वडा कार्यालय, ५ हजार ३१८ विद्यालय र ४ हजार २४९ स्वास्थ्य संस्था गरी १६ हजार २०८ स्थानमा इन्टरनेट जडान गरिएको छ ।

त्यस्तै, सोही कोषको प्रयोग गर्दै निर्माण भइरहेको मध्यपहाडी लोकमार्ग तथा जिल्ला सदरमुकाम जोड्ने सूचना महामार्ग निर्माण प्रक्रिया पनि ३ प्याकेजमा अगाडि बढिरहेको छ, जसअन्तर्गत पहिलो खण्ड (प्रदेश-१, मधेश र बागमती प्रदेश) र तेस्रो खण्ड (कर्णाली र सुदूरपश्चिम प्रदेश) को काम नेपाल दूरसञ्चार कम्पनी NTC गरिरहेको छ । 

पहिलो खण्डअन्तरगत टेलिकमले २ वर्षभित्र काम सम्पन्न गर्ने गरी २ हजार १७८ किलोमिटर अप्टिकल फाइबर बिछ्याउनुपर्नेमा हालसम्म १ हजार ३२६ किलोमिटर मात्रै अप्टिकल फाइबर बिछ्याएको छ । तेस्रो खण्डमा १ हजार ९९२ किलोमिटर अप्टिकल तार बिछ्याउनुपर्नेमा ३३० किलोमिटर मात्रै तार बिछ्याइएको छ ।

दोस्रो प्याकेज (गण्डकी र लुम्बिनी प्रदेश) को ठेक्का यूनाईटेड टेलिकम UTL ले पाए पनि समयमा काम नगरेको भन्दै ठेक्का खोसिएपछि UTL अदालत गएको थियो । तर अदालतको अन्तरिम आदेशका कारण ४ वर्षदेखि यो खण्ड अलपत्र छ ।

त्यस्तै, सोही कोषबाट सञ्चालित अर्को परियोजना भूकम्प अति प्रभावित ८ जिल्ला काभ्रेपलाञ्चोक, सिन्धुपाल्चोक, रसुवा, नुवाकोट, दोलखा, सिन्धुली रामेछाप र ओखलढुङ्गाका ७६ स्थानीय तह, सामुदायिक माध्यमिक विद्यालयहरू तथा स्वास्थ्य संस्थामा नन डेडिकेट २० एमबीपीएस क्षमताको इन्टरनेट जडान गरी २ वर्षसम्मको महसुल उपलब्ध गराउने योजनाअनुसार ७३ तहसँग सम्झौता भएको पनि प्राधिकरणले जनाएको छ । यो परियोजना अन्तर्गत हालसम्म ४ करोड १५ लाख ३८ हजार रूपैयाँ भुक्तानी भएको छ । 

त्यस्तै, भूकम्प प्रभावित र काठमाडौं उपत्यका बाहेकका ६६ जिल्लाका ६५६ स्थानीय तह, सामुदायिक माध्यमिक विद्यालयहरू तथा स्वास्थ्य संस्थामा नन डेडिकेट २० एमबीपीएस क्षमताको इन्टरनेट जडान कार्य सञ्चालन भइरहेकोमा हालसम्म ३२६ स्थानीय तहसँग सम्झौता भइसकेको छ भने सो कार्य गर्न १२ करोड ८६ लाख ५३ हजार रूपैयाँ स्थानीय तहलाई भुक्तानी भएको प्राधिकरणले जनाएको छ ।

Neco insurance LimitedAarthik Abhiyan Viber Community
प्रतिक्रिया [0]

   

TVCNepali Patro