नेपाली फुटवेयर उद्योगमा थपियो 'नेको' ब्राण्डको प्रिमियम शुज, काठमाडौं मलमा खुल्यो शोरुम

२०७९ माघ, १२

समाचार उपभोक्ता

काठमाडौं मलमा शोरुम उद्‍घाटन गर्दै बायाँबाट प्रदीप कोइराला, शाक्षी बस्नेत, जयदेव कलौनी र निरज जैसवाल ।

अभियान संवाददाता

काठमाडौं । २५ देखि ३५ वर्ष उमेर समूहका ४ जना युवाले ‘नेको’ ब्राण्डमा फुटवेयर उद्योग शुरू गरेका छन् ।

कञ्चनपुरका जयदेव कलौनी, दाङकी शाक्षी बस्नेत, पोखराका प्रदीप कोइराला र वीरगञ्जका निरज जैसवालको साझेदारीमा नेको क्रिएशन प्रालि मार्फत नेको ब्राण्डमा जुत्ता उद्योग शुरू गरेका हुन् ।
वीरगञ्जमा उद्योग स्थापना गरेका उनीहरूले काठमाडौंमा तीन ओटा आउटलेटबाट जुत्ता विक्री गर्ने लक्ष्य लिएका छन् ।

नेकोले बिहीवार काठमाडौं मलको तेस्रो तल्लामा पहिलो आउटलेट उद्घाटन गरेको छ । आगामी चैत्र भित्र देशभरका ३३ ओटा शोरूमबाट नेको ब्राण्डका जुत्ताहरू विक्री वितरण गर्ने नेको क्रिएशनका अध्यक्ष जयदेव कलौनीले बताए ।

कोरोनाले सबै व्यापार व्यावसाय ठप्प हुँदा उनले नेपालमा प्रिमियम शुजको बजार अध्ययन गरेका थिए । जसमा ३ हजारसम्मको जुत्ता सहजै पाइने र त्यो भन्दा महँगो जुत्ता खोज्दा सिधै १२/१५ हजारको जुत्ता मात्रै भेटाए ।
३ हजारको जुत्ता मन नपरे ४/५ हजारको जुत्ता किन्न सक्छन् भन्ने भएपछि कलौनीले विदेशबाट आयात गर्दा १० हजारभन्दा बढी मूल्य पर्ने जुत्ता नेपालमै उत्पादन गरेर ४/५ हजारमै बेच्ने निधो गरेका थिए । त्यसपछि उनले बंगलादेशको २५ वर्ष पुरानो फुटवेयर कम्पनीसँग लगानीको प्रस्ताव गरेर उद्योग शुरू गरेका हुन् ।

५ करोड रुपैयाँ बंगलादेशको विदेशी लगानीसहित १० करोड रुपैयाँ लगानीमा शुरू भएको उद्योगले वार्षिक १ लाख ८० हजार जोर जुत्ता उत्पादन गर्न सक्छ । उद्योगमा १०० जनालाई प्रतक्ष रोजगारी दिइएको छ । जसमा अहिले २० जना बंगलादेशी नागरिकले पनि काम गरिरहेका छन् ।

कम्पनीका ४ जना संस्थापक मध्ये प्रदीप कोइराला चार्टड एकाउन्टेन्ट हुन् भने निरज जैसवाल बीबीए अध्ययनरत विद्यार्थी हुन् । शाक्षीले होटल म्यानेजमेन्टको अध्ययन गरेकी छिन् भने कलौनीले व्यवस्थापनमा स्नातकोत्तर गरेका छन् ।

३ हजारको जुत्ता मन परेन, १० हजारको किन्न सकिएन भने...
नेपाली कम्पनीले उत्पादन गरिरहेका जुत्ताहरू मध्ये सस्तो खोज्नेलाई १ हजार देखि १५ सय रुपैयाँ हाराहारीका जुत्ता बजारमा छन् । मध्यम वर्गकोले खोज्ने जुत्ता २ देखि ३ हजार रुपैयाँ हाराहारीका हुन् ।

तर, अपर मिडिल क्लासले भने नत ३ हजारको जुत्तामा चित्त बुझाउँछ, नत १२/१५ हजार रुपैयाँ हालेर विदेशी जुत्ता लगाउन सक्छ । हो यहि ग्यापलाई पूरा गर्न नेको शुज बजारमा आएको कलौनी बताउँछन् ।

‘हाम्रो कन्सेप्ट नै अहिलेका नेपाली जुत्ताभन्दा माथिल्लो रेञ्ज र विदेशी जुत्ता भन्दा तल्लो रेञ्जका जुत्ता उपभोक्तालाई दिने हो ।’ कलौनीले भने, ‘अर्थात मध्यम/अपर मध्यम वर्गका मान्छेलाई अफोर्डेबल मूल्यमा प्रिमियम जुत्ता बेच्ने मुख्य उद्देश्य हो ।’

कम्पनीले अहिले फाइन लेदरबाट बनेका फर्मल, सेमी फर्मल लेदर शुज र क्याजुअल स्पोर्स्टस् शुज मात्रै उत्पादन गरिरहेको छ । जसको मूल्य लेदर शुजतर्फ ४५ सय देखि ८ हजारसम्म र स्पोर्टस् शुज तर्फ २ हजार देखि ४५ सय सम्म रहेको छ । आउटलेट उद्घाटन गरेको उपलक्ष्यमा अहिले १० दिनसम्म जुत्ता किन्दा २० प्रतिशत छुटको व्यवस्था गरिएको छ ।

अनुभवी कम्पनीसँग साझेदारी, नयाँ प्रविधिको प्रयोग
बंगलादेशमा २५ वर्षदेखि जुत्ता उत्पादन गरिरहेको एक अनुभवी कम्पनीसँगको साझेदारीमा नेपालमा यो उद्योग स्थापना गरिएको हो ।

कम्पनीले पछिल्लो प्रविधिलाई अनुसरण गरेर जुत्ता उत्पादन गर्छ । नेकोले नयाँ प्रविधिमा आधारित २ करोड रुपैयाँ भन्दा बढी मूल्यका मेशिनरी मात्रै खरीद गरेको कलौनीले बताए ।

भविष्यमा विदेशमा जुत्ता निर्यात गर्न सहज होस भनेर वीरगञ्जमा उद्योग स्थापना गरेको उनको भनाइ छ ।

नेपालमा औद्योगिक वातावरण सहज हुँदै नगएमा भोलिका दिनमा विदेश निर्यात गर्ने वा बंगलादेशमै उद्योग स्थापना गरेर पनि अन्य मुलुकमा जुत्ता निर्यात गर्ने कम्पनीको योजना छ । तस्वीर : सुनिल शर्मा/आर्थिक अभियान