जो प्रतिस्पर्धी भएपनि बालेनको विजयी जुलुसमा गए, उनकै नेतृत्वमा शुरू भयो बालेनविरुद्ध आन्दोलन

अभियान संवाददाता

काठमाडौं । काठमाडौं महानगरपालिकाका मेयर बालेन साह ‘बालेन’ निर्वाचित भएपछिको विजयी जुलुसमा थिए उनकै प्रत्यासी सुमन सायमी । मेयरका प्रत्यासी नै विजयी जुलुसमा आएपछि त्यतिबेला बालेनका समर्थक अचम्म परेका थिए । विजयी जुलुसमा मात्रै होइन, सायमीले मेयर साहलाई निर्वाचित भएताकाका हरेक कदममा साथ दिए । 

तर, पछिल्लो समय उनी मेयर साहका कामकारबाहीप्रति सन्तुष्ट छैनन् । मेयर साहले मनपरीरूपमा डोजर चलाएको भन्दै उनी अहिले रुष्ट बनेका छन् । आइतवार काठमाडौंको माइतीघर मण्डलामा भएको विरोध प्रदर्शनको नेतृत्व पनि उनैले गरेका थिए । 

मेयर साहले गैरकानूनी ढंगले महानगरपालिकाभित्र डोजर आतंक फैलाएको भन्दै उपत्यकाव्यापी सडक विस्तार पीडित संघर्ष समिति, काठमाडौंको आह्वानमा आइतवार दिउँसो माइतीघर मण्डलामा विरोध प्रदर्शन गरिएको हो । 

प्रदर्शनका क्रममा सायमीले मेयर साहले नागरिकको सम्पत्तिको अधिकारमाथि समेत हनन् हुनेगरी डोजर आतंक फैलाउने काम गरेको आरोप लगाए । त्यसो हुन नदिनका लागि खवरदारी गर्न प्रर्दशनमा उत्रिएको बताउँदै उनले जनतालाई दुःख दिने काम भइरहे सह्य नहुने चेतावनी दिए ।   

प्रदर्शनमा बोल्ने वक्ताहरूले मेयर साहलाई जनताको प्रतिनिधि भएर जनतालाई दुःख दिने काम नगर्न चेतावनीसमेत दिएका छन् । उनीहरूले गैरकानूनी ढंगले संविधानले व्यवस्था गरेको भूमिको अधिकार, व्यक्तिगत सम्पत्तिको अधिकार हनन् गरेर मेयर साहले ज्यादती गरेको भन्दै आक्रोश व्यक्त गरेका छन् । उनीहरूले विनासूचना, विनाप्रमाण सडक विस्तारको नाममा गैरकानुनी ढंगले सूचना समेत नदिई व्यक्तिगत सम्पत्तिमाथि डोजर चलाउने काम तत्काल बन्द गर्न पनि काठमाडौं महानगरपालिकालाई सचेत गराएका छन् । 

प्रदर्शनकारीहरूले आदिवासीको भूमिको अधिकार सुनिश्चित गर, संविधानले सुनिश्चित गरेको सम्पत्तिको अधिकार सुनिश्चित गर, डोजर आतंक बन्द गर, महानगरको ज्यादती बन्द गर लगायतका नाराबाजी गरेका थिए । 

काठमाडौं महानगरपालिकाले गैरकानुनी ढंगले व्यक्तिको सम्पत्तिमाथि समेत डोजर चलाउने काम गरेपछि स्थानीयले त्यसको विरोधमा प्रदर्शन गर्दै आएका छन् ।

प्रतिक्रिया [0]