तीन दिन बढेपछि पुनः घट्यो नेप्से, कारोबार रकम ८९ करोड ९५ लाखमा सीमित

अभियान संवाददाता

काठमाडौं । लगातार तीन दिनमा ३१ अंक बढेको नेप्से परिसूचक साताको अन्तिम कारोबार दिन बिहीवार १० दशमलव ८७ अंक घटेर १ हजार ९०८ दशमलव ५५ विन्दुमा झरेको छ ।

आइतवार नेप्से परिसूचक तीन महीनायताकै न्यून विन्दु १८८१ मा झरेको थियो । त्यसपछि बजारमा थोरै मात्रमा खरीदकर्ता आएको देखिन्छ । लगानीकर्ता बजारप्रति विश्वस्त नहुँदा बजार केही बढ्ने बित्तिकै विक्रेता हाबी भएसँगै पुनः घटेको देखिन्छ ।

यस दिन सेन्सेटिभ इन्डेक्स १ दशमलव ६६ अंक, फ्लोटेड इन्डेक्स शून्य दशमलव ७२ अंक र सेन्सेटिभ फ्लोट इन्डेक्स शून्य दशमलव ६१ अंक घटेको छ ।  बिहीवार २५४ धितोपत्रको २७ लाख ५० हजार ६५५ कित्ता २६ हजार ४३४ पटकमा रू. ८९ करोड ९५ लाख बराबरको कारोबार भएको छ ।

कारोबारमा आएका धितोपत्रमध्ये सुपर माई हाइड्रोपावरको शेयर मूल्य ९ दशमलव ९९ प्रतिशत वृद्धि भई रू. ५७२ दशमलव ४० पुगेको छ । त्यस्तै सिटिजन्स म्युुचुअल फण्ड २ को इकाई मूल्य ६ दशमलव ८१ प्रतिशत बढेर रू. ८ पुगेको हो । 

यस दिन आदर्श लघुवित्त वित्तीय संस्थाका शेयरधनीले सर्वाधिक गुमाएका छन् । कम्पनीको शेयर मूल्य ६ दशमलव शून्य ७ प्रतिशत घटेर रू. १ हजार १६१ मा झरेको छ । त्यस्तै दोस्रोमा जाल्पा सामुदायिक लघुवित्तको शेयर मूल्य ३ दशमलव ८६ प्रतिशत घटेर रू. १ हजार ८७० कायम भएको छ । 

बिहीवार शिवम् सिमेन्टको सर्वाधिक शेयर खरीदविक्री रू. ५ करोड बराबर भएको छ । कम्पनीको शेयर मूल्य प्रतिकित्ता रू. ४१५ कायम भएको छ । त्यस्तै सर्वाधिक शेयर खरीदविक्री हुने दोस्रोमा हिमालयन डिष्टिलरीको रू. ३ करोड १२ लाख बराबर छ ।

यस दिन कारोबारमा आएका १३ समूहगत परिसूचकमध्ये दुई समूहको सूचक बढेको छ भने बाँकी समूहको सूचक घटेको छ । सबैभन्दा बढी होटल तथा पर्यटन समूहको शून्य दशमलव ५० प्रतिशत बढेको छ भने घट्नेमा ‘अन्य’ समूहको १ दशमलव ११ प्रतिशत घटेको हो । 

पछिल्लो समय बजारप्रति लगानीकर्ताहरू विश्वस्त नभएको देखिएको छ । बजार घट्न पनि सकेको छैन भने बढ्न पनि सकेको छैन । यसरी बजारमा क्रेता/विक्रेता सक्रिया नहुँदा कारोबार रकम अर्बभन्दा मुनि झरेको छ ।

प्रतिक्रिया [0]