अमेरिकाका कारण टाट पल्टियो भारतको चौथो ठूलो वायु सेवा कम्पनी 'गो फर्स्ट', '१ खर्ब घाटामा'

काठमाडौं । भारतीय विमान सेवा प्रदायक कम्पनी गो फर्स्ट (Go First) टाट पल्टिएको छ । यात्रीको संख्याका आधारमा त्यहाँको चौथो ठूलो घरेलु विमान सेवा प्रदायक कम्पनीले आफू ऋण तिर्नै नसक्ने अवस्थामा पुगेको भन्दै इन्सल्भेन्सी कानूनको धारा १० अन्तर्गत अदालती संरक्षण माग्दै आवेदन दिएको हो । 

अमेरिकी इञ्जिन आपूर्तिकर्ताका कारण आफू टाट पल्टिएको भन्दै कम्पनीले अदालती संरक्षण मागेको हो । कम्पनीले एक्कासी आफ्ना सयौं उडानहरु पनि रद्द गरेको थियो । गो फर्स्ट सस्तो खालको हवाई सेवा प्रदान गर्ने (Budget Airlines) कम्पनी हो । यो सन् २०१९ यता धराशयी हुने भारतको पहिलो शीर्ष हवाई सेवा प्रदायक पनि हो ।

त्यति बेला जेट एयरवेज (Jet Airways) टाट पल्टिएको थियो । जेट एयरवेज एक दशकभित्र टाट पल्टिने तेस्रो भारतीय एयरलाइन्स थियो । कोरोना भाइरसको महामारीको प्रभावबाट भारतको हवाई उड्ययन क्षेत्र उब्रिरहेको अनि यात्रीहरुको संख्या पनि कीर्तिमानी स्तरमा उक्लिरहेकै समयमा कम्पनी टाट पल्टिएको हो । 

करीब २ दशकदेखि व्यवसाय चलाइरहेको गो फर्स्ट घाटामा चलिरहेको थियो । कम्पनीले मंगलवार एक्कासी मे ३ देखि मे ५ को बीचमा सबै उडानहरु रद्द गरेको घोषणा गर्दै भारतको दिल्ली स्थित राष्ट्रिय कम्पनी ल ट्रिब्यूनल (एनसीएलटी)मा स्वेच्छिक रुपमा दामासाहीमा जान चाहेको भन्दै आवेदन दिएको थियो ।

कम्पनीको ६० प्रतिशतभन्दा धेरै उडान ग्राउन्डेड भइसकेको थियो । अमेरिकी कम्पनी प्र्याट एन्ड ह्वाइट्नीसँग कम्पनीले किनेको इञ्जिनहरुमा सधैं समस्या आइरहेको कम्पनीले भनेको छ । इञ्जिनमा समस्याका कारण गो फर्स्ट ले ५७ थान एयरबस ए३२० नियो मध्ये आधा ग्राउन्डेड गर्न बाध्य बनेको बताइएको छ ।

समाचारहरुका अनुसार मार्च ३० सम्ममा कम्पनीको ३० थान विमान ग्राउन्डेड थिए । यसका कारण कम्पनीको १ खर्ब ८ अर्ब भारतीय रुपया (१ अर्ब ३० करोड डलर) बराबर आम्दानी गुमेको अनि खर्च बढेको बताइएको छ । कम्पनीले प्र्याट एन्ड ह्वाइट्नीमाथि सिंगापुरमा आकस्मिक आर्बिट्रेटरले दिएको आदेश पालना गर्न पनि असफल भएको आरोप लगाएको छ ।

सो आर्बिट्रेशनमा प्र्याट एन्ड ह्वाइट्नीलाई सन् २०२३ को अप्रिल २७ सम्ममा गो फर्स्टलाई कम्तिमा पनि १० ओटा सर्भिसेबल स्पेयर इञ्जिन भाडामा दिन निर्देशन दिएको थियो । सोही कारण कम्पनी घाटामा गएको आरोप गो फर्स्टको थियो । भारतमा हवाई सेवा व्यापारमा प्रचुर सम्भावना छ । तर पनि त्यहाँ बारम्बार कम्पनीहरु असफल भइरहेका छन् ।

भारतले यो वर्ष चीनलाई उछिनेर विश्वको सबैभन्दा धेरै जनसंख्या भएको देश बन्ने अनुमान संयुक्त राष्ट्र संघले गरेको छ । मध्यम वर्गिय जनसंख्या बढेसँगै हवाई यात्राको माग पनि बढेका छन् । भारतको घरेलु हवाई क्षेत्रको आधाभन्दा धेरै हिस्सा इन्डिगोको पोल्टामा छ ।

घरेलु बजारको ७ दशमलव ८ प्रतिशत हिस्सा भएको यो कम्पनी यात्रीको संख्याका आधारमा भारतको चौथो ठूलो हवाई सेवा प्रदायक हो । यस वर्षको पहिलो त्रैमासमा २९ लाख १० हजार यात्रीहरुले गो फर्स्टबाट यात्रा गरेका थिए । तर पनि कम्पनीले आफूलाई जोगाएर राख्न सकेन । एजेन्सी

प्रतिक्रिया [0]