सुपर दोर्दी ‘ख’ जलविद्युत् आयोजनाबाट व्यावसायिक उत्पादन शुरू

अभियान संवाददाता

काठमाडौं। लमजुङको दोर्दी खोलामा निर्माण सम्पन्न भएको सुपर दोर्दी ‘ख’ जलविद्युत् आयोजनाले शनिवारदेखि व्यावसायिक उत्पादन शुरू गरेको छ ।

पिपुल्स हाइड्रोपावर कम्पनीद्वारा प्रवद्र्धित ५४ मेगावाटको उक्त आयोजनाले परीक्षणपछि व्यापारिक उत्पादन शुरू गरेको आयोजनाका निर्देशक अर्जुन गौतमले जानकारी दिए । उनका अनुसार परीक्षण प्रसारण सकेर शनिवारदेखि आयोजनाको बिजुली राष्ट्रिय प्रणालीमा जोडिएको छ ।

नेपाल विद्युत् प्राधिकरण भार प्रेषण केन्द्रका प्रमुख सुरेश भट्टराईका अनुसार शनिवारदेखि राष्ट्रिय प्रसारण लाइनमा ५४ मेगावाट थपिएसँगै नेपालको जलविद्युत्को कुल जडित क्षमता २ हजार ७०० मेगावाट पुगेको छ । २०७४ सालमा शुरू भएको आयोजनाको निर्माण २०७८ सालमा सम्पन्न गर्ने लक्ष्य राखिएको थियो । तर, कोरोना महामारी, दोर्दी खोलामा आएको बाढी लगायत कारण निर्माणमा ढिलाइ भएको आयोजनाका निर्देशक गौतमले जानकारी दिए ।

लमजुङको दोर्दी गाउँपालिकामा निर्माण भएको यो आयोजनाबाट हिउँदमा ५३ दशमलव शून्य ३ गिगावाट आवरसहित वार्षिक ३१४ दशमलव ९८ गिगावाट आवर विद्युत् उत्पादन गर्ने लक्ष्य राखिएको छ । २०७१ सालमा नेपाल विद्युत् प्राधिकरण र आयोजनाबीच विद्युत् खरीद विक्री सम्झौता भएको थियो।
 

प्रतिक्रिया [0]