गोबर ग्यास निर्माण गर्ने उपभोक्ता बढे 

अभियान संवाददाता

तीन वर्षयता सुदूरपश्चिमको कैलाली र  कञ्चनपुर जिल्लाका ग्रामीण भेगमा जैविक ऊर्जामा आधारित गोबरग्यास तथा बायोग्यासको लोकप्रियता निकै बढेको छ । ती दुई जिल्लामा मात्रै अहिलेसम्म १७ हजार ४ सय १९ गोबरग्यास प्लाण्ट निर्माण भइसकेको घरेलु गोबरग्यास तथा प्रविधि विकास कम्पनीका प्रमुख वेदप्रकाश पाण्डेले बताए । 

त्यसमध्ये कैलालीमा ९ हजार ८ सय ७७ र कञ्चनपुरमा ७ हजार ५ सय ४२ गोबरग्यास छन् । कैलाली जिल्लाको हसुलिया गाविस भने बायोग्यास नमूना गाउँका रूपमा स्थापित भएको छ । 

कम्पनीका अनुसार सेती र महाकाली अञ्चलका पहाडी जिल्लामा पनि क्रमिक रूपमा गोबरग्यासको लोकप्रियता बढिरहेको छ । अहिलेसम्म ती दुई अञ्चलका डँडेलधुरा, बैतडी, डोटी, दार्चुला, अछाम, बझाङ र बजारमा गरी ५ सय ३४ गोबरग्यास प्लाण्ट निर्माण भइसकेको पनि सो कम्पनीले बताएको छ । 

घरमै पालिएका गाई, भैंसीको गोबरको प्रयोगबाट यस्तो ग्यास बनाइने हुनाले कृषहरूलाई निकै सजिलो भएको छ । विशेषगरी इन्धनको अभाव र मूल्यवृद्धि झेलिरहनुपर्ने उपभोक्ताहरू गोबरग्यास प्लाण्टको स्थापनापछि आफूहरूलाई आर्थिक रूपमा पनि निकै लाभ भएको बताउँछन् । गेटा गाविस–३ का लालप्रसाद चौधरीले आफूले एक वर्षदेखि गोबरग्यास प्लाण्टबाट खाना पकाउने गरेको बताए । 
वर्ष ६, अंक ४०, सोमवार, ८ कात्तिक, २०६७

प्रतिक्रिया [0]