२४० जनालाई शीप तथा व्यावसायिक उद्यमशीलता तालीम दिँदै पोखरा महानगरपालिका

अन्नपूर्ण (कास्की) । पोखरा महानगरपालिकाले शीप तथा व्यावसायिक उद्यमशीलता तालीम प्रदान गर्ने भएको छ । महानगरपालिकाको आर्थिक विकास महाशाखाअन्तर्गतको व्यवसाय प्रवर्द्धन केन्द्र (बीपीसी) को आयोजनामा विभिन्न १० विधामा २४० जनालाई शीप तथा व्यावसायिक उद्यमशीलता तालीम प्रदान गर्न लागिएको हो ।

तालीमका लागि छनोट भएका २४० जनाका लागि सोमबार अभिमुखीकरण कार्यक्रम गरिएको थियो । १० विधामध्ये पञ्जेबाजा बजाउने र बारिस्ताको तालीम शुरू भइसकेको व्यवसाय प्रवर्द्धन केन्द्रका प्रमुख कार्यकारी अधिकृत नवराज अधिकारीले जानकारी दिए । 

१० विधाअन्तर्गत पञ्चेबाजा बजाउने, सिलाइकटाइ, ब्युटी पार्लर, मन्टेश्वरी, सुनचाँदीका गहना निर्माण, भाषा तालीम, एसी जडान, कुक, बारिस्ता, प्लम्बिङलगायत छन् । विभिन्न संघसंस्थासँगको समन्वय तथा महानगरपालिकाको लगानीमा तालीम सञ्चालन हुने कार्यकारी अधिकृत अधिकारीले बताए ।

तालीम प्राविधिक शिक्षा तथा व्यावसायिक तालीम परिषद् (सीटीईभीटी) र कतिपय गण्डकी बहुप्राविधिक शिक्षालयको समेत पाठ्यक्रममा आधारित हुनेछ । तालीम १६० देखि ३९० घण्टासम्मका हुने कार्यकारी अधिकृत अधिकारीले जानकारी दिए । 

महानगरपालिकाका प्रमुख धनराज आचार्यले महानगरभित्र रोजगार सृजना गर्दै उद्यमशीलता विकास गर्ने उद्देश्यले तालीम आयोजना गरिएको बताए । ‘महानगरपालिकाभित्र स्वरोजगार सृजना गर्न तालीमका विभिन्न अवसर सृजना गर्ने हाम्रो उद्देश्य हो,’ प्रमुख आचार्यले भने, “तालीमपश्चात् आवश्यक प्राविधिक सहयोग गर्ने साथै आवश्यक परेको खण्डमा ‘स्टार्ट अप’ मा बीउ पूँजीका लागि हामीले सहयोग गर्छौं ।’ 

सानो लगानीबाट पनि व्यावसायिक सफलताको लामो यात्रा पूरा गर्न सकिने उल्लेख गर्दै प्रमुख आचार्यले आफूले आर्जन गरेको ज्ञानको व्यावहारिक उपयोगमा जोड दिए । जागिरे मानसिकताले व्यक्तिको जीवनमा सार्थक परिवर्तन ल्याउन नसक्ने जनाउँदै स्वरोजगारसहितको उद्यमी बन्ने सपना देख्नु आवश्यक रहेको उनले बताए । -रासस

प्रतिक्रिया [0]