भाउ नपाउँदा बारीमै सुक्दै बन्दा, किलोको पाँच रुपैयाँभन्दा बढी नपाइएको किसानको दुखेसो

दाङ । जिल्लाको घोराही उपमहानगरपालिका–१७ कर्जाहीका किसान बाबुराम चौधरीले एक विघा जमिनमा लगाएको बन्दागोभी विक्री नहुँदा मारमा परेका छन् । तरकारी खेती गर्ने र त्यहीबाट आएको रकमले घरव्यवहार चलाउने उद्देश्यले व्यावसायिक खेती गर्दै आएका उनको तयारी अवस्थामा रहेको बन्दागोभी हालसम्म विक्री हुन सकेको छैन । 

चौधरीले घोराही–६, गुरुवागाउँमा लगाएको सबै बन्दागोभी अहिले बारीमै सुक्न थालेको छ । एक विघा जमिनमा रोपेको ‘नेपाल ग्रिण ७७७’ जातको बन्दागोभी तयार भए पनि बेच्न समस्या भएको छ । बजारमा सस्तोमा पाउन थालेपछि बन्दागोभी विक्री गर्न समस्या भएको उनको भनाइ छ ।

‘घरखर्च धान्न सकिएला की भनेर एक विघामा बन्दागोभी लगाएको थिएँ, विक्री गर्न नसक्दा सुक्न थालेको छ,’ चौधरीले भने, ‘खरिद गर्न कोही पनि आएका छैनन् ।’ प्रतिकिलो रू पाँचभन्दा बढी भाउ नपाउँदा विक्री नगरेको उनको भनाइ छ । 

चौधरीले रू ७० हजार खर्च गरेर एक विघा जमिनमा बन्दागोभी लगाएको बताए । उनले भने, ‘विक्री गर्न बजारमा लैजाँदा पनि कोही किन्न तयार भएनन्, थोरै मूल्यमा विक्री गर्न मनले मानेन, त्यसपछि विक्री गर्न बजार लैजान छोडेको छु ।’ 

प्रतिकिलो रू पाँचमा बन्दागोभी बेच्दा आफ्नो लगानी नै नउठ्ने उनको भनाइ छ । 

हाल पाउँदै गरेको मूल्यले बन्दागोभीको बीउ उमार्नदेखि खानका लागि तयार पार्दासम्म भएको खर्च उठ्ने अवस्था नभएको चौधरी बताउँछन् । ‘व्यापारीसित समन्वय गर्दा बन्दागोभीको बजार छैन भन्ने खबर पाएँ,’ उनले भने । यस वर्ष जिल्लामा प्रशस्त उत्पादनसँगै बाहिरबाट धेरै मात्रामा बन्दागोभी आउँदा आफ्नो उत्पादन विक्री गर्न धौ–धौ भएको उनले बताए ।  

विगत दश वर्षदेखि तरकारी खेती गर्दै आएका चौधरीले बन्दागोभी खेतीबाट अघिल्ला वर्षमा मनग्य आम्दानी लिएका थिए । ‘बन्दागोभी नबिक्ने समस्या यसअघि कहिल्यै आएन,’ उनले भन्नुभयो । 

तरकारी विक्रीको व्यवस्था मिलाउन जिल्लाका अन्य व्यवसायीलाई अनुरोध गरे पनि सबै ठाउँमा यस्तै समस्या रहेको र बजारमा माग नभएको जवाफ पाएको चौधरी बताउँछन् । ‘अब बन्दागोभी विक्री हुँदैन, बारीमै सुकेर जान्छ,’ उनले भने । जिल्लामा सस्तोमा बाहिरबाट तरकारी भित्रिँदा स्थानीय किसान समस्यामा परेका छन् । रासस

प्रतिक्रिया [0]