बेलायतमा विदेशी विद्यार्थीले डिपेन्डेन्ट भिसामा परिवार ल्याउन रोक, वर्क रुट परिवर्तन गर्न पनि नपाइने

अभियान संवाददाता

काठमाडौं ।  बेलायतको अध्यागमनले विदेशी  विद्यार्थीहरुलाई साथमा परिवार ल्याउनमा रोक लगाएको छ । 

अब देखि बेलायतमा पढाइ सकेर अनुसन्धान कार्यक्रममा रहेकाहरुले मात्रै साथमा छोराछोरी, मातापिता र आश्रितहरु आदि परिवारका सदस्यलाई ल्याउन पाउनेछन् । अनुसन्धान बाहेकका विषयमा ग्रयाजुएट गरेकाहरुले भने परिवारका सदस्यलाई ल्याउन पाउने छैनन् । 

अध्यागमन नियन्त्रण कानून अन्तरगत बेलायतले यस्तो नियम ल्याएको हो । मंगलबार बेलायत सरकारले अध्यागमनमा कडाई गर्ने नयाँ कानूनको घोषणा गरेको थियो । बेलायतमा अब विदेशी विद्यार्थीहरुले पढाई पूरा नभएसम्म विद्यार्थी भिसामा भएको बेलामा वर्क रुट पनि परिवर्तन गर्न नपाउने भएका छन् । 

शिक्षाको नाममा आप्रवासन बेच्ने दलालहरुमाथि कडाई गर्न बेलायतले यो कदम चालेको हो । हालैका वर्षहरुमा बेलायतमा विद्यार्थी भिसामा आश्रित भएर जानेको संखया बढेको थियो । सन् २०२२ भर झन्डै १ लाख ३६ हजार भिसा विद्यार्थी भिसाका आश्रितहरुलाई दिइएको थियो । यो सन् २०१९ को तुलनामा आठ गुणा भन्दा धेरै  थियो । 

सन् २०१९ मा यसको संख्या १६ हजार मात्रै थियो । नयाँ कठोर नियमहरु सकेसम्म छिटै लागू हुने आशा गरिएको छ । यसबारे सरकारले शिक्षा क्षेत्र र प्रमुख सरोकारवालाहरुसँग परामर्श भने गर्न बाँकी छ । नेपालबाट पनि बेलायत विद्यार्थी भिसामा जानेको संख्या धेरै छ ।

एक जना विद्यार्थी भिसामा भएको बेलामा काम गर्न र खर्च बर्च जुटाउन भनेर आश्रित भिसामा जाने प्रवृत्ति उच्च छ । बेलायतले नियममा गरेको यस परिवर्तनले नेपाली विद्यार्थीहरु पनि प्रभावित हुनेछन् । एजेन्सी

प्रतिक्रिया [0]