लगातार तीन दिन घटेको बजार दोहोरो अंकले बढ्यो, सबै समूहमा हरियाली 

अभियान संवाददाता

काठमाडौं । कर दुविधाका कारण लगातार घटेको बजार बिहीवार भने दोहोरो अंकले बढेको छ । साताको अन्तिम कारोबार दिन नेप्से परिसूचक शून्य दशमलव ८९ प्रतिशत अर्थात् १६ दशमलव ५४ अंक बढेर १ हजार ८६६ दशमलव ३४ विन्दुमा पुगेको छ । 

विशेषगरी करका विषयमा लगानीकर्ताको चित्त नबुझाउँदा बजेटपछि दुई दिनमा बजार ४ दशमलव ८ प्रतिशत घट्यो । पुँजीगत लाभकरलाई नै अन्तिम कर मान्नुपर्ने लगानीकर्ताले बताएका छन् । लगानीकर्ताले हाल तिरिरहेको पुँजीगत लाभकर अन्तिम नभएको अर्थ लाग्ने भाषा बजेटमा प्रयोग गरिएको छ । 

यसकारण करका विषयमा दुविधा उत्पन्न भयो । बुधवार आन्तरिक राजस्व विभागले सूचना जारी गरी लगानीकर्तालाई थप कर थोपर्ने नियत नभएको भनेपछि बिहीबार बजार केही सम्हालिएको अनुमान गरिएको छ । यद्यपि लगानीकर्ताहरूले भने आन्दोलन गर्ने घोषणा गरेका छन् ।

आज लगानीकर्ताले केही ब्रोकर हाउसमा गएर कारोबार बन्द गर्नसमेत आग्रह गरेका थिए । लगातार तीन दिन घटेको बजारमा पुनः अल्पकालीन कारोबारीहरू खरीदमा सक्रिय भएको पनि देखिन्छ । 

यस दिन २७२ धितोपत्रको ६१ लाख २८ हजार ६२१ कित्ता २९ हजार ९२२ पटकमा रू. १ अर्ब ६५ करोड बराबर कारोबार भएको हो । कारोबारमा आएका धितोपत्रमध्ये जोशी हाइड्रोपावर डेभलपमेन्ट कम्पनीको शेयर मूल्य सबैभन्दा बढी ६ दशमलव ९४ प्रतिशत वृद्धि भई रू. २८६ दशमलव ६० पुगेको छ । त्यस्तै दोस्रोमा बिपिडब्लु लघुवित्त वित्तीय संस्थाको शेयर मूल्य ६ दशमलव शून्य ८ प्रतिशत बढेर रू. ४०२ दशमलव ९० पुगेको हो । 

बिहीवार सबैभन्दा बढी सनराइज फोकस्ड इक्वीटी फण्डको इकाई मूल्य ६ प्रतिशत घटेर रू. ७ दशमलव ८३ मा झरेको छ । त्यस्तै आत्मनिर्भर लघुवित्त वित्तीय संस्थाको शेयर मूल्य ५ दशमलव ४२ प्रतिशत घटेर रू. १ हजार ८९२ कायम भएको छ । यस दिन प्रभु बैंकको संस्थापक शेयरको सर्वाधिक रू. २३ करोड २१ लाख बराबर कारोबार भएको छ । त्यस्तै दोस्रोमा शिवम् सिमेन्ट्सको रू. ११ करोड २५ लाख बराबर कारोबार भएको छ । 

यस दिन कारोबारमा आएका १३ ओटै समूहगत परिसूचक समग्र बढेका छन् । निर्जीवन बीमा समूहको परिसूचक सबैभन्दा बढी १ दशलमव ९३ प्रतिशत बढेको हो । सेन्सेटिभ इन्डेक्स शून्य दशमलव ६२, फ्लोट इन्डेक्स शून्य दशमलव ८८ र सेन्सेटिभ फ्लोट इन्डेक्स शून्य दशमलव ६० प्रतिशत वृद्धि भएका छन् ।

प्रतिक्रिया [0]