लुम्बिनी केबलकारको औपचारिक उद्घाटन आज

अभियान संवाददाता

काठमाडौं  । लुम्बिनी केबलकारको औपचारिक उद्घाटन आज (बिहीवार) हुने भएको छ । प्रधानमन्त्री पुष्पकमल दाहालले केबलकारको उद्घाटन गर्नुहुने भएको हो । आइएमई समूहको लगानीमा बनेको लुम्बिनी केबलकार व्यावसायिक रूपमा सञ्चालन हुनेगरी औपचारिक उद्घाटन गर्न लागिएको हो ।

बुटवलको गोलपार्क बमघाटदेखि पाल्पाको तिनाउ गाउँपालिका–३ वसन्तपुरसम्म ३ किलोमिटर दूरीको केबलकार लुम्बिनी प्रदेशको पहिलो केबलकार हो । वसन्तपुरमा भारतको गुहावटीमा रहेको मन्दिरकै शैली र कलामा कामाख्या मन्दिर बनेको छ । कामाख्या मन्दिरको दर्शनले मनोकामना पूरा हुने र सांसारिक बन्धनबाट मुक्ति पाइने धार्मिक विश्वास रहेको धर्मगुरु किशोर गौतमले बताए ।

केबलकारको दैनिक सञ्चालनका लागि बुटवल उपमहानगरपालिका र तिनाउ गाउँपालिकासँग त्रिपक्षीय सम्झौता भइसकेको छ । लुम्बिनी केबलकार प्रालिले प्रतिटिकट शुल्कको २ प्रतिशत रकम दुई ओटा पालिकाका लागि छुट्ट्याउने सम्झौता छ । आइएमई समूहले सञ्चालनमा ल्याउन लागेको यो तेस्रो केबलकार हो । यसअघि कम्पनीले काठमाडौंको चन्द्रागिरि र नवलपुरको गैंडाकोट (मौलाकालिका)मा सञ्चालनमा ल्याइसकेको छ ।

प्रतिक्रिया [0]