वैशाखमा उपभोक्ता मूल्यवृद्धि दर घटेर ७.४१ प्रतिशतमा

अभियान संवाददाता

काठमाडौं । वैशाखमा वार्षिक बिन्दुगत उपभोक्ता मुद्रास्फीति (मूल्यवृद्धि दर) घटेको छ । नेपाल राष्ट्र बैंकले शुक्रवार सार्वजनिक गरेको मासिक वित्तीय विवरण अनुसार वैशाखको मुद्रास्फीति ७.४१प्रतिशत रहेको छ ।

गत चैतमा यस्तो मुद्रास्फीति ७.७६ प्रतिशत थियो । २०७९ वैशाखमा यस्तो मुद्रास्फीति भने ७.८७ प्रतिशत थियो । 

वैशाखमा खाद्य तथा पेय पदार्थ समूहको मुद्रास्फीति ५.५४ प्रतिशत र गैर–खाद्य तथा सेवा समूहको मुद्रास्फीति ८.८९ प्रतिशत रहेको छ ।

समीक्षा महीनामा खाद्य तथा पेय पदार्थ समूहअन्तर्गत मरमसला उप–समूहको वार्षिक बिन्दुगत मूल्य सूचकाङ्क २६.६१ प्रतिशत, रेष्टुरेण्ट तथा होटलको १४.८७ प्रतिशत, खाद्य तथा खाद्यजन्य पदार्थको १३.६९ प्रतिशत, दुग्ध पदार्थ तथा अण्डाको १०.४१ प्रतिशत र सुर्तीजन्य पदार्थको ८.४९ प्रतिशतले बढेको छ ।

यो महीनामा काठमाडौं उपत्यकामा ७.६८ प्रतिशत, तराईमा ७.१५ प्रतिशत, पहाडमा ७.५७ प्रतिशत र हिमालमा ७.१२ प्रतिशत मुद्रास्फीति रहेको छ । 

प्रतिक्रिया [0]