निगुरो र जिब्रे बेचेर आम्दानी

अभियान संवाददाता

रौतहट। जंगलमा पाइने निगुरो, जिब्रे लगायतका जंगली तरकारी बेचेर रौतहटका ग्रामीण भेगका स्थानीयले आम्दानी गर्दै आएका छन् । विशेषगरी वर्षाको समयमा जंगलमा पाइने निगुरो, जिब्रे लगायत तरकारी विक्री गरेर ग्रामीण महिला र बालबालिकाले आम्दानी गर्दै आएका हुन् । चन्द्रपुर नगरपालिका–८ बेतौनाकी १४ वर्षीया राधा पटेल अभिभावक र छिमेकीसँग जंगलमा गएर निगुरो र जिब्रे टिपी बजारमा विक्री गर्दै आएको बताउँछिन् । विद्यालय बिदा भएको समयमा निगुरो र जिब्रे टिपी बजारमा विक्री गर्दा शैक्षिक सामग्री लगायतको खर्च टर्दै आएको उनको भनाइ छ ।

उनको टोलमा उनीमात्र होइन, अन्य बालबालिका पनि विद्यालय बन्द रहेको समयमा निगुरो र जिब्रे टिप्न जाने गरेका छन् । अहिले निगुरो र जिब्रे पाइने समय भएकाले अधिकांश बालबालिका र अभिभावक यसको खोजीमा जाने गरेको स्थानीय बलराम बस्नेतले बताए । यसबाट भएको कमाइले बालबालिकाले पढाइ खर्च जुटाउन सघाउ पुग्ने उनको भनाइ छ । ‘अभिभावकलाई पनि घरखर्च चलाउन सहयोग पुग्ने हुँदा निगुरो, जिब्रे लगायत जंगली तरकारीको खोजीमा स्थानीयको आकर्षण देखिएको छ,’ उनले भने । चन्द्रनिगाहपुर बजारमा निगुरो र जिब्रे प्रतिमुठा २५ देखि ३० रुपैयाँसम्ममा विक्री हुने गरेको छ ।

प्रतिक्रिया [0]