प्रकाशकुमार खण्डेलवाल औषधि व्यवसायीको अध्यक्षका प्रत्याशी 

अभियान संवाददाता

वीरगञ्ज। नेपाल औषधि व्यवसायी संघको अध्यक्षमा वीरगञ्जका व्यवसायी प्रकाशकुमार खण्डेलवालले दाबेदारी पेश गरेका छन् । वीरगञ्जमा हुन लागेको संघको महाधिवेशनमा उनी अध्यक्ष पदका लागि अकांक्षीको रूपमा अघि सरेका हुन् । यही भदौ २२ र २३ गते हुने महाधिवेशनले आगामी ३ वर्षका लागि नयाँ कार्य समिति चयन गर्ने छ । अहिले संघको वरिष्ठ उपाध्यक्ष रहेका खण्डेलवालले लामो समयदेखि संघका विभिन्न जिम्मेवारीमा रहेर काम गरेका छन् । 

यसअघि संघको कार्यकारिणी सदस्य, कोषाध्यक्ष र उपाध्यक्षको जिम्मेवारी सम्हालिसकेका खण्डेलवालको ४ पुस्ता औषधिको कारोबारमा संलग्न रहँदै आएको छ । १८ वर्षदेखि औषधि व्यवसायी संघमा सक्रिय खण्डेलवाल आफूमा औषधिको आयात, थोक र खुद्रा सबै खालको अनुभव रहेकोले सरोकारका समस्या समाधान गर्न सक्ने दाबी गर्दछन् । बुटवलका व्यवसायी लोकहरि श्रेष्ठ पनि अध्यक्षको दाबेदारको रूपमा अगाडि सरेका छन् । उनी पनि औषधिको व्यापारमा अनुभवी व्यवसायी हुन् । यसअघिको महाधिवेशनमा उनी अध्यक्ष पदको प्रतिस्पर्धामा पराजित भएका थिए । संघको महाधिवेशनले अध्यक्ष, वरिष्ठ उपाध्यक्ष, ३ जना उपाध्यक्षसहित ९ जना पदाधिकारी र १० जना कार्यकारिणी सदस्य चयन गर्ने संघले जानकारी दिएको छ ।

प्रतिक्रिया [0]