११ हजारभन्दा बढी उद्योग व्यवसाय स्थानीय तहलाई हस्तान्तरण

अभियान संवाददाता

वीरेन्द्रनगर। सुर्खेतमा ११ हजारभन्दा बढी उद्योग व्यवसाय स्थानीय तहलाई हस्तान्तरण गरिएको छ । प्रदेश व्यापार–व्यवसाय (दर्ता तथा सञ्चालन) नियमावली, २०८० बमोजिम उद्योग, वाणिज्य तथा उपभोक्ता हित संरक्षण निर्देशनालय सुर्खेतमा दर्ता भई सञ्चालनमा रहेको १० लाख रुपैयाँसम्म स्थिर पूँजी भएका व्यवसाय र ३ लाख रुपैयाँसम्म स्थिर पूँजी भएका लघु घरेलु उद्योग स्थानीय तहलाई हस्तान्तरण गरिएको हो । 

यसअघि निर्देशनालयमा दर्ता तथा नवीकरण भइरहेका सुर्खेतका ११ हजार ६७८ ओटा व्यवसाय स्थानीय तहलाई हस्तान्तरण गरिएको निर्देशनालयका ग्राम इकाइ सहायक टोपेन्द्र बिसीले बताए । शुक्रवारसम्ममा सुर्खेतका सबै पालिकाका कर्मचारीलाई निर्देशनालयले सम्बन्धित उद्योग व्यवसायका कागजपत्र हस्तान्तरण गरिसकेको छ । जिल्लाका ९९ ओटा लघु घरेलु उद्योग र वाणिज्य (पसल)तर्फका ११ हजार ५७९ व्यवसायका कागजपत्र स्थानीय तहलाई हस्तान्तरण गरिएको बिसीले जानकारी दिए ।

वीरेन्द्रनगर नगरपालिकामा उद्योगतर्फ ६१ र वाणिज्यतर्फ ७ हजार ७२० व्यवसाय हस्तान्तरण भएको नगरपालिकाका प्रशासकीय अधिकृत दिपेन सुवेदीले जानकारी दिए । भेरीगंगा नगरपालिकामा उद्योगतर्फ पाँच र वाणिज्यतर्फ ९९८ व्यवसाय हस्तान्तरण भएका छन् । गुर्भाकोट नगरपालिकामा उद्योगतर्फ आठ र वाणिज्यतर्फ ९६३ व्यवसाय हस्तान्तरण भएका छन् । लेकबेशी नगरपालिकामा उद्योगतर्फ १० र वाणिज्यतर्फ ३५१ व्यवसाय हस्तान्तरण भएका छन् । पञ्चपुरी नगरपालिकामा उद्योगतर्फ पाँच र वाणिज्यतर्फ ४५१ व्यवसाय हस्तान्तरण भएको बताइएको छ । यस्तै सिम्ता गाउँपालिकामा एउटा उद्योग र ३२६ वाणिज्य, चिंगाड गाउँपालिकामा दुई उद्योग र २४८ ओटा वाणिज्य, वराहताल गाउँपालिकामा चार उद्योग र २४८ वाणिज्यतर्फका व्यवसाय हस्तान्तरण गरिएको छ । चौकुने गाउँपालिकामा भने उद्योग तीन र वाणिज्यतर्फका व्यवसाय २७४ ओटा हस्तान्तरण भएको जानकारी दिइएको छ ।

प्रतिक्रिया [0]