रोजगारीका नाममा गलत सूचना प्रवाह बढ्यो : विभाग

अभियान संवाददाता

काठमाडौं। वैदेशिक रोजगार विभागले विदेशमा आकर्षक रोजगारी पाइने भन्दै गलत सूचना प्रवाह हुने क्रम बढेको बताइएको छ । विभागले शुक्रवार प्रेस विज्ञप्ति जारी गर्दै वैदेशिक रोजगारीमा जान खोज्ने जो कोहीले विभागको आधिकारिक बेबसाइटमा राखिएका कामदार माग सम्बन्धी सूचनाको आधारमा मात्र निर्णय लिन आग्रह गरेको छ । केही दिनअघि सामाजिक सञ्जालमा जर्मनीमा तीन हजार सहायक कामदार पठाउने भन्दै झुटो विज्ञापन प्रकाशित भएको थियो । उक्त सूचना गलत रहेको समेत विभागले स्पष्ट पारेको छ ।

अनधिकृत व्यक्ति तथा संस्थाले सरकार र जर्मनी सरकारबीच भएको सम्झौताको भएको भन्दै विभिन्न सेवा–सुविधासहित आकर्षक तलबसम्बन्धी विवरण देखाएर नक्कली सूचना निकालेको पाइएको विभागले बताएको छ । यस्ता भ्रमपूर्ण विज्ञापन र सूचनाप्रति आफ्नो ध्यानाकर्षण भएको विभागको भनाइ छ ।

वैदेशिक रोजगारीमा जानका लागि विभिन्न मुलुकबाट आएका मागपत्रलाई विभागले सार्वजनिक जानकारीका लागि वेबसाइटबाट सार्वजनिक गरेपछि मात्र थप प्रक्रिया शुरू हुने गर्छ । यकीन भएका मागपत्रको आधारमा मात्र म्यानपावर व्यवसायीले खुला गरिएका गन्तव्यमा विभागले तोकेको शुल्क लिएर युवायुवतीलाई वैदेशिक रोजगारीमा पठाउने कानूनी व्यवस्था छ । हाल नेपालले संस्थागत रूपमा विश्वका १११ देशमा श्रमका लागि जान खुला गरेको छ । 

प्रतिक्रिया [0]