‘आन्तरिक उत्पादन बढाउने गरी १६औं योजना’

अभियान संवाददाता

काठमाडौं। आन्तरिक उत्पादन वृद्धि, आयात प्रतिस्थापन र रोजगारी सृजनालाई प्राथमिकतामा राखेर १६औं योजना तर्जुमा गर्न नेपाल उद्योग परिसंघले सुझाव दिएको छ । १६औं योजना तर्जुमा गर्दा प्राथमिकतामा राख्नुपर्ने विषयबारे परिसंघले गरेको अध्ययनसहितको प्रतिवेदन राष्ट्रिय योजना आयोगलाई पेश गर्दै यस्तो सुझाव दिएको हो ।

परिसंघका अध्यक्ष राजेशकुमार अग्रवालले आयोगका उपाध्यक्ष डा. मीनबहादुर श्रेष्ठलाई आइतवार परिसंघको सुझाव हस्तान्तरण गरे । सो अवसरमा अध्यक्ष अग्रवालले १६औं योजना औद्योगिक विकासमा केन्द्रित गर्नुपर्नेमा जोड दिए । औद्योगिक विकासमा केन्द्रित हुन एकीकृत औद्योगिक विकास रणनीति बनाउनुपर्ने, उद्योगका लागि जग्गाको सिलिङ तोक्न नहुने, नीतिगत स्थायित्व र अनुमान गर्न सकिने तथा आन्तरिक उत्पादनलाई प्राथमिकता दिन ‘मेक इन नेपाल स्वदेशी अभियान’को प्रवर्द्धन गरिनुपर्ने उनले बताए ।

यसैगरी गुणस्तरीय पूर्वाधार विकासका लागि न्यून बोलकबोललाई आधार मानेर आयोजना दिन नहुने, सीमा क्षेत्रमा हुने अवैध कारोबार नियन्त्रण गरिनुपर्ने, नेपालको निर्यात प्रवर्द्धन गर्न विभिन्न मुलुकसँग दोहोरो करमुक्त सम्झौता गर्नुपर्ने र रोजगारमूलक शीप विकासलाई उच्च प्राथमिकतामा राख्नुपर्ने परिसंघले सुझाएको छ । 

प्रतिक्रिया [0]