हिमालय एअरलाइन्स्को काठमाडौं–छिइङताओ उडान शुरू: १० गन्तव्यबाट १० लाख पर्यटक भित्त्याउने लक्ष्य

अभियान संवाददाता

काठमाडौं। हिमालय एअरलाइन्स्ले काठमाडौंबाट चीनको पर्यटकीय शहर छिइङताओमा हवाई उडान शुरू गरेको छ । उक्त एअरलाइन्स्ले चीनतर्फ गन्तव्य बढाउँदै छिइङताओमा आइतवारदेखि चार्टर्ड उडान शुरू गरेको हो ।

त्रिभुवन अन्तरराष्ट्रिय विमानस्थलमा छिइङताओको पहिलो उद्घाटन उडानमा सवार यात्रुलाई संस्कृति, पर्यटन तथा नागरिक उड्डयनमन्त्री सुदन किराती, नेपालका लागि चिनियाँ राजदूत छन सोङ र हिमालय एअरलाइन्स्का अध्यक्ष झो एनयोङले स्वागत गरेका थिए ।

दुई देशबीच पर्यटन प्रवर्द्धन गर्ने उद्देश्यले काठमाडौंबाट छिइङताओमा सीधा उडान सञ्चालन गरिएको कम्पनीका उपाध्यक्ष विजय श्रेष्ठले जानकारी दिए । कम्पनीले चीनका कम्तीमा १० गन्तव्यमा उडान गर्ने र वार्षिक १० लाख पर्यटक भित्त्याउने लक्ष्य रहेको उनले बताए । ‘हिमालयको उडान पर्यटकीय दृष्टिकोणले महत्त्वपूर्ण हुन्छ । हाम्रो आठवर्षे हवाई यात्राका क्रममा चीनसँगको सम्बन्ध प्रगाढ तुल्याउँदै बढीभन्दा बढी पर्यटक भित्त्याउने लक्ष्य छ,’ उनले भने ।

उद्घाटन उडानका अवसरमा आयोजित पत्रकार सम्मेलनमा पर्यटनमन्त्री किरातीले चीनको सांस्कृतिक एवं पर्यटकीय शहर छिइङताओमा हिमालयले पहिलो पर्यटक उडान गरेर पर्यटनका लागि महत्त्वपूर्ण योगदान पुर्‍याएको उल्लेख गरे । दुई देशबीच पर्यटन र व्यापारको प्रचुर सम्भावना रहेको भन्दै उनले यस उडानले त्यसमा ठूलो टेवा पुग्ने अपेक्षा गरे ।

चिनियाँ राजदूत छनले काठमाडौं–छिइङताओ–काठमाडौं उडानको आरम्भ हुनु नेपाल–चीनबीचको बढ्दो सहयोगको प्रमाण भएको बताए । चीनले नेपालको हवाई पूर्वाधार विकासमा सक्रिय भूमिका निर्वाह गर्दै आएको उनले उल्लेख गरे । ‘यस नयाँ रूटले नेपालको उड्डयन उद्योगमा नयाँ गति ल्याउनेछ,’ उनले भने, ‘यसले हाम्रो द्विपक्षीय सम्बन्धमा नयाँ अध्याय थप्दै दुई देशबीचको मित्रता र सहयोगमा ठूलो योगदान पुग्नेछ ।’

कम्पनीका अध्यक्ष झोले काठमाडौं–छिइङताओ–काठमाडौं उडानको शुरुआत हुनु हिमालय एअरलाइन्स्का लागि गौरवको विषय भएको बताए । ‘छिइङताओ चीनको महत्त्वपूर्ण व्यापारिक एवं वित्तीय केन्द्र हो, जसले एसियालाई यूरोपसँग जोड्छ,’ उनले भने । यस उडानमार्फत दुवै देशले पर्यटन प्रवर्द्धन गर्ने उद्देश्य लिएको कम्पनीले बताएको छ । सातामा चार उडान गर्ने र यात्रुको चापअनुसार आगामी दिनमा उडान थप्ने योजना रहेको कम्पनीले बताएको छ । नेपाल नागरिक उड्डयन प्राधिकरणसँग अनुमति लिएर अक्टोबरदेखि नियमित उडान शुरू गर्ने योजना रहेको कम्पनीले बताएको छ । कम्पनीले चीनका विभिन्न १० गन्तव्यमा चार्टर्ड उडानका साथै दुबई, मलेसिया, कतार, साउदी अरेबिया, बंगलादेशलगायत गन्तव्यमा नियमित उडान गर्दै आएको छ ।

प्रतिक्रिया [0]