नेप्से परिसूचकसँगै कारोबार रकममा वृद्धि, यस कारण सक्रिय हुन थाले लगानीकर्ता

अभियान संवाददाता

काठमाडौं । साताको दोस्रो कारोबार दिन सोमवार नेप्से परिसूचक सँगै कारोबार रकम बढेको छ । परिसूचक अघिल्लो कारोबार दिनको तुलनामा ४४ दशमलव ३० अंक अर्थात २ दशमलव २८ प्रतिशत बढेर १ हजार ९८६ दशमलव ९९ विन्दुमा पुगेको हो । २७८ धितोपत्रको ४७ लाख ४२ हजार ५११ कित्ता शेयर ३७ हजार ७९९ पटकमा रू. १ अर्ब ५१ करोड भन्दा बढीको कारोबार भएको छ ।

आइतवारको तुलनामा कारोबार पनि वृद्धि भएको हो । आइतवार रू. १ अर्ब बराबरको शेयर कारोबार भएको थियो । 
सोमवार सेन्सेटिभ इन्डेक्स २ दशमलव ०६ प्रतिशत,फ्लोट इन्डेक्स २ दशमलव ३७ प्रतिशत र सेन्सेटिभ फ्लोट इन्डेक्स २ दशमलव २६ प्रतिशत वृद्धि भएको हो । 

मौद्रिक निति सार्वजनिक पछि बजार करीब डेढ महीना  जति लगातार घटेको बजार सम्हालिन खोजेको देखिएको छ । निरन्तर घटेको बजारमा कम्पनीको शेयर मूल्य निकै सस्तिएकोले लगानीकर्ताहरु विस्तारै खरीदतर्फ आर्कषित भएका हुन । यसोत लाभांशको सिजन शुरु हुन थालेको छ । यस कारण अव बजारमा विस्तारै खरीदकर्ता सक्रिय हुने जानकारहरु बताउँन । 
अर्थ मन्त्रालयले स्थानीय तहको सञ्चित कोषमा रहेको रकम मध्येबाट ६० प्रतिशत रकम निक्षेपका रूपमा गणना गर्न पाउने सुविधा दिएको छ । यस प्रावधानबाट झन्डै ६० अर्ब रुपैयाँ निक्षेप थपिने देखिएको छ । यसले ब्याजदर घटाउने सहयोग पुग्ने भएको हो । ब्याजदर घट्यो भने त्यसको सकारात्मक प्रभाव शेयर बजारमा देखिने जानकारहरू बताउँछन् । 

विशेषगरी, शेयर धितो कर्जामा १२ करोडको क्याप अनि १५० प्रतिशतको जोखिमभार नै बजारलाई प्रत्यक्षरुपमा प्रभाव पार्ने नीतिहरु मानिएका छन् । यही नीतिका कारण बजारमा ठूला र संस्थागत लगानीकर्ता कर्जा लिएर आउन सकेका छैनन् । यी नितिगत अवरोधलाई समाधान गर्न सकेमा शेयर बजारले नयाँ विन्दु कायम गर्न सक्ने लगानीकर्ताहरु बताउँछन् । 

कारोबारमा आएका धितोपत्रमध्ये थ्रि स्टार हाइड्रोपावरको शेयर मूल्य सबैभन्दा बढी ९ दशमलव ९८ प्रतिशत वृद्धि भएको छ । शेयर मूल्य प्रतिकित्ता रू. ३७८ पुगेको हो । त्यस्तै दोस्रोमा मेन्छियाम हाइड्रोपावरको शेयर मूल्य ९ दशमलव ९७ प्रतिशत बढेर रू. २१५ पुगेको हो । 

सोमवार सिद्धार्थ इन्भेष्टमेन्ट ग्रोथ स्किम २ का इकाईधनीहरुले गुमाएका छन् । फण्डको इकाई मूल्य ७ दशमलव ४३ प्रतिशत घटेसँगै धेरै गुमाएका हुन । इकाई मूल्य रू. ७ दशमलव ९७ म ाझरेको छ । त्यस्तै दोस्रोमा ८.५∞ नेपाल बैंक डिबेञ्चर २०८७ नामक ऋणपत्रको मूल्य ३ दशमलव ७८ प्रतिशत घटेर रू. ७८५ मा कायम भएको छ । 

सर्वाधिक शेयर खरीद विक्रीको हिस्सा साल्ट ट्रेडिङ कर्पोरेशनले ओगटेको छ । कम्पनीको रू. ६ करोड २५ लाख बराबरको शेयर कारोबार भएको हो । कम्पनीको शेयर मूल्य रू. ५ हजार ७ सय कायम भएको छ । सार्वधिक शेयर खरीदविक्री हुने दोस्रोमा एभरेष्ट बैंकको रू. ५ करोड ७१ लाख बराबरको भएको हो । 

कारोबारमा आएका १३ अ‍ोटै समूहगत परिसूचक सबै बढेका छन्। सबैभन्दा बढी वित्त समूहको परिसूचक ३ दशमलव ६५ प्रतिशत वृद्धि भएको छ । त्यस्तै दोस्रोमा ब्यापार समूहको परिसूचक ३ दशमलव ६३ प्रतिशत वृद्धि भएको हो । 
 

प्रतिक्रिया [0]