नेपालमा सामसङको लगानी तथा उत्पादनबारे राष्ट्रपतिको चासो

अभियान संवाददाता

काठमाडौं। राष्ट्रपति रामचन्द्र पौडेलसँग कोरियाको सामसङ कम्पनीका ग्लोबल प्रेसिडेन्ट सिउङ ही पार्कले सोमवार शिष्टाचार भेट गरेका छन् । सो भेटमा राष्ट्रपति पौडेलले कोरियाले गरेको विकासको प्रशंसा गर्दै सूचना प्रविधिका विभिन्न पक्षमा चासो राख्नुभएको थियो ।

राष्ट्रपति भवन शीतल निवासमा भएको सो भेटमा पार्कले सामसुङ कम्पनीले नेपालमा सञ्चालन गरेको विभिन्न उत्पादन तथा सोसम्बन्धी गतिविधिबारे संक्षिप्तमा जानकारी गराएका थिए । सो अवसरमा उनले नेपालमा सञ्चालन गर्न सकिने उद्योग, नेपाली विद्यार्थीलाई उच्चस्तरको सूचना प्रविधिसम्बन्धी तालीमका सम्भावनाका विषयमा प्रष्ट पारेका थिए । भविष्यमा सामसङ कम्पनी र नेपालबीच हुन सक्ने सहयोग र सूचना प्रविधि तथा औद्योगिक उत्पादन सम्बन्धी योजनाबारे पनि पार्कले सो अवसरमा जानकारी गराएका थिए ।

सो अवसरमा सामसङका उपाध्यक्ष द्वय ह्युङ वु ली र सुङ जुन पार्क, प्रबन्ध निर्देशक ह्यून ली, नेपालका लागि कोरियाली राजदूत थेयङ पार्क, गोल्छा समूहका अध्यक्ष शेखर गोल्छा लगायतको उपस्थिति थियो ।

स्वदेशमै टीभी उत्पादन र रोजगारीको अवसर 

सामसङ कम्पनीको प्रविधिमा आधारित रहेर गोल्छा समूहले नवलपरासीको भूमहीमा पूर्ण टीभी जडान उत्पादन कारखाना सञ्चालनमा ल्याएको पनि सो अवसरमा जानकारी दिइएको छ । गत अप्रिलदेखि सो कारखाना सञ्चालनमा आएको थियो । सो कारखाना पूर्ण क्षमतामा सञ्चालन हुँदा वार्षिक एक लाखओटा टीभी तयार हुने तथा एक हजार जनाले रोजगारी पाउन सक्ने बताइएको छ । यस्तै सामसङको प्रविधि हस्तान्तरण कार्यक्रमअन्र्तगत पुल्चोक इञ्जिनीयरिङ क्याम्पसमा सञ्चालित ‘सामसङ इन्नोभेसन क्याम्पस’मा सय जना विद्यार्थीलाई सहभागी गराई दुईवर्षे कार्यक्रम सञ्चालन भइरहेको जानकारी दिइएको छ ।

प्रतिक्रिया [0]