मंगलवार नेपाल एसबिआई बैंकको सर्वाधिक रकमको शेयर कारोबार

शुभम पावरको शेयर मूल्यमा उच्च वृद्धि

अभियान संवाददाता

काठमाडौं । मंगलवार धितोपत्र दोस्रो बजारमा १ अर्ब १३ करोड ५० लाख रुपैयाँभन्दा बढीको ३९ लाख १६ हजार १६१ कित्ता धितोपत्र कारोबार भएको छ । अघिल्लो कारोबार दिन सोमवारको तुलनामा यो दिन कारोबार रकम घटेको हो । मंगलवार १ अर्ब ५१ करोड ८३ लाख रुपैयाँभन्दा बढीको ४७ लाख ४२ हजार ५११ कित्ता धितोपत्र कारोबार भएको थियो । 

मंगलवार कुल कारोबार रकममा सर्वाधिक हिस्सा नेपाल एसबिआई बैंक लिमिटेडले ओगटेको छ । यस दिन बैंकको ७ करोड ५६ लाख १८ हजार रुपैयाँभन्दा बढीको २ लाख २४ हजार ९४४ कित्ता धितोपत्र कारोबार भएको हो ।

सर्वाधिक रकमको कारोबार भएको बैंकको शेयर मूल्य भने प्रतिकित्ता २ रुपैयाँले घटेको छ । मंगलवार बैंकको अन्तिम शेयर मूल्य प्रतिकित्ता ३३८ रुपैयाँ कायम भएको हो । 

अघिल्ला दुई कारोबार दिन निरन्तर बढेको बजार तेस्रो कारोबार दिन भने घटेको हो । मंगलवार समग्र धितोपत्र कारोबार मापक नेप्से परिसूचक १० दशमलव ४२ अंक घटेर १ हजार ९६७ दशमलव ५७ विन्दुमा झरेको छ । छोटो समयमै लगानीकर्ताले नाफा बुक गरेकाले मंगलवारको बजार प्रभावित बनेको प्रतिक्रिया धितोपत्र व्यवसायीहरूले दिएका छन् । बजारले गति लिनेमा अझै लगानीकर्ता आशावादी नदेखिएकाले पनि छोटो समयमै नाफा बुक गरेको धितोपत्र व्यवसायीहरूको बुझाइ छ ।

नेप्से परिसूचकसँगै ठूला कम्पनीहरूको मात्र कारोबार मापक सेन्सेटिभ इन्डेक्स २ दशमलव ५० अंक घटेर ३७९ दशमलव १४ विन्दुमा झरेको छ । मंगलवारको कारोबारमा घटेको बजारमा पनि ३३ कम्पनीको धितोपत्र मूल्य बढेको छ । यो दिन शुभम पावर लिमिटेडको शेयर मूल्य सर्वाधिक ९ दशमलव ९९ प्रतिशत बढेको छ । यस कम्पनीको शेयर मूल्य प्रतिकित्ता ७४ रुपैयाँले बढेर अन्तिम मूल्य ८१४ रुपैयाँ ६० पैसा कायम भएको हो । 

मंगलवार म्युचुअल फण्डबाहेक सबै समूहका परिसूचक घटेका छन् । म्युचुअल फण्डको परिसूचक भने शून्य दशमलव शून्य ४ प्रतिशत बढेको हो । होटल तथा पर्यटन समूहको परिसूचक यस दिन सर्वाधिक १ दशमलव ९८ प्रतिशत घटेको हो । 
त्यस्तै वित्तको १ दशमलव ९२ प्रतिशत, जलविद्युतको १ दशमलव ५६ प्रतिशत, विकास बैंकको १ दशमलव ४४ प्रतिशत, लघुवित्तको १ दशमलव ४० प्रतिशत, निर्जीवन बीमाको १ दशमलव ४० प्रतिशत, लगानीको १ दशमलव ३१ प्रतिशत, उत्पादन तथा

प्रशोधनको १ दशमलव शून्य ८ प्रतिशत, जीवन बीमाको शून्य दशमलव ९९ प्रतिशत, व्यापारिकको शून्य दशमलव ७८ प्रतिशत, बैंकिङको शून्य दशमलव ४३ प्रतिशत र अन्यको शून्य दशमलव २४ प्रतिशत परिसूचक घटेको हो ।

मंगलवारको कारोबारमा सर्वाधिक शेयर मूल्य थ्री स्टार हाइड्रोपावर लिमिटेडको घटेको छ । यस कम्पनीको शेयर मूल्य प्रतिकित्ता ३७ रुपैयाँ ८० पैसाले घटेर अन्तिम शेयर मूल्य प्रतिकित्ता ३४० रुपैयाँ २० पैसा कायम भएको हो । यो दिन कुल बजार पूँजीकरण २९ खर्ब ४५ अर्ब ५० करोड ८३ लाख रुपैयाँ कायम भएको छ । एकै दिन कुल बजार पूँजीकरण २९ अर्ब रुपैयाँभन्दा बढीले घटेको हो । अघिल्लो कारोबार दिन कुल बजार पूँजीकरण २९ खर्ब ७४ अर्ब ५८ करोड ३२ लाख रुपैयाँ रहेको थियो ।

प्रतिक्रिया [0]