‘युवा उद्यमशीलता शिखर सम्मेलन’को मुख्य प्रायोजक राष्ट्रिय वाणिज्य बैंक

अभियान संवाददाता

काठमाडौं। राष्ट्रिय वाणिज्य बैंकले ‘युवा उद्यमशीलता शिखर सम्मेलन’को तेस्रो संस्करणकोे मुख्य प्रायोजन गर्ने भएको छ । राष्ट्रिय युवा परिषद् र नेपाल बिजनेस इन्स्टिच्युट (एनबीआई) ले संयुक्त रूपमा आयोजना गर्ने शिखर सम्मेलनको मुख्य प्रायोजक राष्ट्रिय वाणिज्य बैंक रहने सम्झौता भएको हो ।

सन् २०१९ देखि शुरू भएको यो सम्मेलनको पहिलो र दोस्रो शिखर सम्मेलनमा पनि बैंकले मुख्य प्रायोजकको रूपमा साझेदारी गरेको थियो । तेस्रो शिखर सम्मेलन भदौ ३० मा हुँदै छ । प्रधानमन्त्री पुष्पकमल दाहालले उद्घाटन गर्ने सम्मेलनमा अर्थमन्त्री, उद्योगमन्त्री, सञ्चारमन्त्री, युवा तथा खेलकुदमन्त्री, योजना आयोगका उपाध्यक्ष, उद्योगीहरू उपेन्द्र महतो, चन्द्र ढकाल, भवानी राणालगायत २० भन्दा बढी वक्ता रहने बताइएको छ ।

सहकार्यबारे सम्मेलन मूल आयोजक कमिटीका संयोजक विशाल गैरे र बैंकका प्रमुख कार्यकारी अधिकृत किरणकुमार श्रेष्ठले समझदारीमा हस्ताक्षर गरेका छन् । बैंकका प्रमुख कार्यकारी अधिकृत श्रेष्ठले पछिल्लो वित्तीय चुनौतीको सामनाका लागि युवालाई आर्थिक क्रियाकलापमा सहभागी गराउँदै स्वदेशमै स्वरोजगारको वातावरण निर्माण गर्नुपर्ने बताए । 

वाणिज्य बैंकले युवा, महिला, कृषिलगायत उत्पादनशील क्षेत्रमा लगानी बढाएको र प्राथमिकताका साथ कर्जा प्रवाह गरेको उनको भनाइ छ । नेपाल बिजनेश इन्स्टिच्युट (एनबीआई) का अध्यक्षसमेत रहेका सम्मेलनका संयोजक गैरेले ७० जिल्लाका ५०० युवा उद्यमी शिखर सम्मेलनमा सहभागी हुने जानकारी दिए ।

प्रतिक्रिया [0]