मापदण्ड विपरीत सञ्चालित पाँच पसललाई जरीवाना

अभियान संवाददाता

रौतहट। मापदण्ड विपरीत सञ्चालनमा रहेका रौतहटका पाँच पसललाई जरीवाना गरिएको छ । वाणिज्य तथा आपूर्ति उपभोक्ता संरक्षण कार्यालय वीरगञ्ज पर्सा, घरेलु तथा साना उद्योग कार्यालय रौतहट र जिल्ला प्रशासन कार्यालय रौतहटका कर्मचारीको टोलीले संयुक्त रूपमा बजार अनुगमन गरेको हो ।

बजार अनुगमनका क्रममा मापदण्ड विपरीत सञ्चालनमा रहेका दास स्टोर्स गरुडा, न्यू जेपी इन्टरप्राइजेज बंकुल, अनिल किराना पसल मौलापुर, मौलापुर पोलिक्लिनिक मौलापुर, मिष्टी जेनरल स्टोर्स देवाही गोनाहीलाई जरीवाना गरिएको हो ।

घरेलु तथा साना उद्योग कार्यालय रौतहटका प्रमुख जयकान्त झाले उनीहरूलाई जनही ५/५ हजार रुपैयाँका दरले जरीवाना गरिएको बताए । अनुगमनका क्रममा म्याद सकिएका सामग्री फेला परेको, फर्म दर्ता नरहेको, साइनबोर्ड नराखेको, खरीद तथा विक्री बिल नराखेको, फर्म नवीकरण नरहेको पाइएको उनले बताए । अनुगमन टोलीले म्याद सकिएको सामान बरामद गर्नुका साथै एक हप्ताभित्र फर्म दर्ता गर्ने सुझाव दिएको छ । 

प्रतिक्रिया [0]