भूकम्प प्रभावितलाई तत्काल सहयोग : विश्व बैंक

२०८० कात्तिक, २०

समाचार

अभियान संवाददाता

काठमाडौं। विश्व बैंकले जाजरकोट भूकम्पबाट प्रभावितलाई तत्काल सहयोग गर्न उपलब्ध कोषबाट स्रोत परिचालन गर्ने भएको छ ।

नेपालको चारदिने भ्रमण पूरा गरी अमेरिका प्रस्थान गर्नुअघि विश्व बैंकका प्रबन्ध निर्देशक आना जेर्डीले एक विज्ञप्ति निकालेर भूकम्पपीडितका निम्ति नेपाल सरकारबाट हुने प्रयासमा बैंकले स्रोत परिचालन गर्ने बताइन् । दक्षिण एशियाका लागि बैंकका उपाध्यक्ष मार्टिन रेजरसँगै चारदिने भ्रमणका क्रममा उनले प्रधानमन्त्री पुष्पकमल दाहाललाई भेटेर नेपालको दिगो एवं समावेशी विकासका लागि बैंकले सहयोग गर्ने प्रतिबद्धता व्यक्त गरेकी थिइन् ।

काठमाडौंस्थित विश्व बैंकको कार्यालयका अनुसार प्रबन्ध निर्देशक जेर्डीले अर्थमन्त्री डा प्रकाशशरण महतलगायत नेपाल सरकारका उच्च अधिकारी, नेपालको विकासका साझेदार, नागरिक समाज, विद्वत वर्गलाई बेग्लाबेग्लै भेटेर नेपालको दिगो एवं समावेशी विकासका निम्ति बैंकले सघाउने र सम्बद्ध निकायबाट पनि त्यस प्रयासमा साझेदारी हुने विश्वास व्यक्त गरेकी छिन् । उनले महिला तथा युवा वर्गलाई शीपमूलक तालिमका माध्यमबाट आत्मनिर्भर एवं उद्यमी बनाउने कार्यक्रम आवश्यक भएकामा जोड दिएकी छिन् ।