भगवती स्टिलको वार्षिक उत्पादन क्षमता ८५ हजार मेट्रिक टन, एकै वर्ष ९५ प्रतिशतले बढ्यो आम्दानी

२०८० कात्तिक, २१

समाचार

अभियान संवाददाता

काठमाडौं । वार्षिक उत्पादन क्षमता ८५ हजार मेट्रिक टन भएको बारामा रहेको भगवती स्टिल इन्डस्ट्रिज प्राइभेट लिमिटेडलको ९४ प्रतिशतले आम्दानी बढेको छ ।

रेटिङ कम्पनी केयर रेटिङ्स नेपालका अनुसार आर्थिक वर्ष (आव) सन् २०२२ मा १ अर्ब ८३ करोड रुपैयाँ सञ्चालन आम्दानी भएको भगवती स्टिलको आव सन् २०२३ मा ९५ प्रतिशतले आम्दानी बढेर ३ अर्ब ५७ करोड रुपैयाँ पुगेको छ । सरकारी परियोजनाहरूमा स्टिलको उत्पादनहरूको विक्री बढेसँगै कम्पनीको आम्दानी बढेको केयर रेटिङ्सले जनाएको छ ।

आव सन् २०२१ मा कम्पनीले ३ अर्ब २२ करोड रुपैयाँ आम्दानी गरेको थियो । कम्पनीले ३ अर्ब ५ करोड रुपैयाँ कर्जाको रेटिङ गराएको छ । केयर रेटिङ्सले कम्पनीको २४ करोड ८७ लाख रुपैयाँको दीर्घकालीन कर्जाको लागि ट्रिपल बी माइनस र २ अर्ब ८० करोड रुपैयाँको अल्पकालीन कर्जाको लागि ए थ्री रेटिङ दिएको छ ।

सन् १९९१ मा स्थापित यस कम्पनीको अध्यक्षमा सुमित कुमार अग्रवाल छन् । कम्पनीले पाइप, सिट, डोर, विन्डो फ्रेम, सटर प्रोफाइल, साइट च्यानल, ट्रस, पोल टावर लगायतको उत्पादनहरू उत्पादन गर्दै आएको छ । कम्पनीले ‘बीएसटी’ ब्राण्डमा मुलुकभर उत्पादनहरू विक्री वितरण गर्दै आएको छ ।