नेप्से परिसूचकसँगै कारोबार रकम बढ्यो, हिमालयन बैंकको संस्थापक शेयरको सर्वाधिक कारोबार

२०८० कात्तिक, २१

लगानी नेप्से विश्लेषण

अभियान संवाददाता

काठमाडौं । साताको तेस्रो कारोबार दिन मंगलवार नेप्से परिसूचकसँगै कारोबार रकम पनि वृद्धि भएको छ । यस दिन परिसूचक ११ दशलमव २२ अंक बढेर १ हजार ८५८ दशमलव ७६ विन्दुमा पुगेको हो । सोमवार करीब रू. ९४ करोड बराबरको शेयर कारोबार भएकोमा मंगलवार बढेर रू. ९९ करोड ६५ लाख बराबरको कारोबार भएको हो । बजार घटेर तल्लो विन्दुमा आएकाले अब बजारमा विस्तारै खरीदकर्ता सक्रिय हुन थालेको जानकारहरू बताउँछन् ।

यस दिन सेन्सेटिभ इन्डेक्स शून्य दशमलव ६९ प्रतिशत, फ्लोट इन्डेक्स शून्य दशमलव ४८ प्रतिशत र सेन्सेटिभ फ्लोट इन्डेक्स शून्य दशमलव ६१ प्रतिशत वृद्धि भएको छ ।

मंगलवार २८५ धितोपत्रको ४३ लाख ३१ हजार २२९ कित्ता शेयर ४० हजार ६ सय पटकमा रू. ९९ करोड ६५ लाख बराबरको शेयर कारोबार भएको छ । कारोबारमा आएका धितोपत्रमध्ये लक्ष्मी लघुवित्त वित्तीय संस्थाको शेयर मूल्य सबैभन्दा बढी ८ दशमलव १६ प्रतिशत वृद्धि भएको छ । यससँगै कम्पनीको शेयर मूल्य प्रतिकित्ता रू. ६८९ पुगेको हो । शेयर मूल्य सर्वाधिक बढ्ने सूचीमा दोस्रोमा रहेको सोनापुर मिनरल्स एण्ड आयल लिमिटेड छ । कम्पनीको शेयर मूल्य ५ दशमलव २८ प्रतिशत बढेर रू. २५७ पुगेको छ ।

मंगलवार सबैभन्दा बढी स्वाभिमान लघुवित्त वित्तीय संस्था लिमिटेडले ओगटेको छ । यस कम्पनीको शेयर मूल्य ८ दशमलव २६ प्रतिशत घटेको छ । यससँगै कम्पनीको शेयर मूल्य प्रतिकित्ता रू.९५५ मा झरेको छ । शेयर मूल्य सर्वाधिक घट्ने सूचीमा दोस्रोमा सिद्धार्थ प्रिमियर इन्स्योरेन्स छ । कम्पनीको शेयर मूल्य ५ दशमलव ९९ प्रतिशत घटेर रू. ७०७ दशमलव ९० कायम भएको छ ।

यस दिन सर्वाधिक शेयर खरीदविक्री हिमालयन बैंकको संस्थापक शेयरको भएको छ । कम्पनीको रू. ९ करोड १६ लाख बराबरको संस्थापक शेयर कारोबार भएको हो । सर्वाधिक शेयर खरीदविक्री हुने दोस्रोमा माछापुच्छ्रे बैंकको रू. ६ करोड ३८ लाख बराबरको भएको छ ।

कारोबारमा आएका १३ समूहगत परिसूचकमध्ये निर्जीवन बीमा समूहको परिसूचक शून्य दशमलव १८ प्रतिशत घटेको छ भने बाँकी सबै समूहको परिसुचक बढेको हो । बढ्नेमा सबैभन्दा बढी लगानी समूहको परिसूचक १ दशमलव ५१ प्रतिशत वृद्धि भएको छ ।